Saturday, May 24, 2008

Le monarchia danese

Durante que le major stationes televisive danese reporta del nuptias de prince Joachim e Marie Cavallier tote le die, io vos presenta alcun informationes del monarchia danese, e alcun reflexiones super su ration de esser.

Le rege danese Frederik le Septime (1808-1863) esseva un homine tranquille e demotic, alora al 21 de martio 1848, quando un demonstration con 15.000 homines, guidate per le politico Orla Lehman, presentava al rege un adresse demandante democratia, ille lo simplemente acceptava.

Dunque le democratia danese nasceva sin que un sol unda de sanguine esseva effundite, e al 5 de junio le proxime anno Danmark habeva su prime constitution democratic - le “Grundlov”.

Il esseva un decision sage per rege Frederik, qui non solmente evitava esser decapitate, como es le costume durante revolutiones, ma anque reteneva un poc de potentia (Danmark esseva solmente completemente democratic in 1901.)

Alora il es gratias al sagessa de Frederik, que Danmark ancora es un monarchia post 160 annos. In nostre era illuminate, stante al summitate de saper e scientia, IT, e technologia genetic, nos ancora ha un familia regal, qui porta coronas, vive in castellos, e transversa le urbes in carrossas auree a occasiones festive. E illo es plus popular que jammais antea.

Nostre regina currente, Margrethe, nos ha guidate desde 1972. Su familia consiste de su sposo prince consorte Henrik (anteriormente conte Henri de Monpezat de Francia) e lor infantes prince hereditar Frederik, e prince Joachim. Joachim es, qui hodie se marita (pro le secunde vice) con le francese Marie Cavallier.

Le familia regal es amate per le (majoritate del) populo, particularmente le regina e le prince hereditar. Le prince consorte al altere latere pare esser un poco minus popular, forsan inter altere proque ille post quaranta annos in Danmark non ancora pote parlar danese solmente partialmente correcte, e proque ille ha declarate que ille soleva castigar su filios “como cavallos e canes”. Ma assi es ya le circumstantias - le familia regal sta super le lege, e on non pote expectar que illes omitte batter su infantes, como es requirite per le lege le resta del population.

Ultra esser un fumator ardente, nostre regina non es le figura jovial e demotic, como esseva p.ex. su patre Frederik le None, le rege marinero qui esseva cognoscite pro su multe tatus. Per contrasto, illa e su familia pare ambir se exclusivemente con personas aristocratic o multo ric, e solmente incontra le populaceo durante le visitas official in varie urbes, que illa debe facer alcun vices cata anno.

Similemente, quando le regina recipe visitantes pro le “Nytårskur” (le celebrationes del nove anno), il es clar que solmente personas ric o distinguite pote esser invitate, justo como solmente tal personas pote esser considerate pro esser innobilite. Le regina ha explicate in intervistas, que isto non es antidemocratic, nam tote personas in nostre societate ha *possibilitates* equal de devenir ric o distinguite.

Ben que il forsan non es multo cortese a iste die festive, on poterea ya demandar se, perque nos ancora hodie debe haber iste institution antiquate que es le monarchia, e si nos es adequatemente reimbursate pro le multe milliones de coronas que nos cata anno paga al sustenentia luxuose de iste poc personas.

Un argumento que on sempre audi demandante iste question, es que le monarchia ha un influentia positive al economia danese - e il es anque ver que membros del familia sovente participa in ferias mercantil e altere eventos ubi illes pote beneficiar le exportation de grande interprisas. Ma in iste dies ubi placias de labor de plus in plus es movite (“outsourced”) al extero, on pote ya demandar se si le reclamo regal vermente beneficia le populo integre, o solmente le actioneros del interprisas.

Un gruppo que vermente es beneficiate per le monarchia es le pressa “colorate”, que sempre ha bon historias a imprimer re le familia regal. P.ex. il ha le cartel de pressa gigante “Aller Press A/S”, que inter multe altere magazines possede “Billed-Bladet” - que consiste quasi solmente de historias elogiose del familia, e “Se & Hør” que ha como su specialitate imprimer historias irreverente de illo.

Finalmente nos naturalmente non debe oblidar le multissime personas qui se gaude per admirar le familia regal. Como actores e cantatores, illes da un poco de brillantia e fabula al vita enoiose de multes.

Si on non pertine a un del tres gruppos mentionate, il pote esser difficile vider le utilitate del monarchia.

In mi opinion le solution es simple. Illes que le monarchia beneficia pote anque mesme pagar pro illo. In Danmark, tote membros del ecclesia popular (statal) debe pagar taxas ecclesiastic. Ma si on se retira del ecclesia on es exemptate del taxas.

Proque non facer le mesme con le monarchia? Totes qui ha (o crede haber) ulle beneficio del monarchia, pote esser “membros del monarchia” e pagar “taxas monarchista”.

E illes qui non vide le utilitate del monarchia, o qui forsan mesmo lo considera un institution antiquate e ridicule, poterea retirar se de illo.

Le monarchia certo superviverea un tal arrangiamento, viste que illo es tanto popular.

Un tal systema es naturalmente politicamente inimaginabile hodie. Ma in le proxime 50 annos le composition ethnic de Danmark se cambiara sin dubita profundemente. Il sera interessante vider que occurre con le monarchia in iste periodo transitori.


Le addition le plus recente al familia regal

7 comments:

Anonymous said...

Tu taxas monarchista me sembla multo interessante. (Ma tote le vetule damas deberea montrar carta de membrato quando illas compra Se & Hør, nonne?)

Ma proque non simplemente considerar un externalisation (outsourcing) del functiones de tote le familias regal de Europa? On pote haber un famila regal subcontractate, habitante Praga, electite por un anno (per medio de votas telephonic e sms) inter le princes e princessas le plus popular. Talmente le journalistas e le paparazzis sempre sape ubi trovar lor victimas.

Ma, seriosemente, le regina danese anque es popular in Norvegia. Anque in Norvegia le familia regal es sufficente popular, ma illos anque es le objecto de critica. On audi generalmente critica contra tote le membros del familia regal, con le sol exception del prince hereditari. Cosa estranie ...

Laurentio said...

Gratias pro haber legite iste posta longissime.

Vetule damas non lege Se & Hør, solmente Billed-bladet (al minus si illas ama le monarchia)! :P

Anque le comprar de iste magazin a pena besoniarea ulle carta de membrato - io anque non pensa que on debe haber un tal pro entrar in un ecclesia. :)

Ma forsan Billed-Bladet (e anque magazines que gania multissime monetas del monarchia) deberea pagar lor quota.

Tu idea es interessante, ma proque justo Praga?

On poterea anque disveloppar tu idea un poco e installar cameras celate ubique in le castello. Alora nos poterea spectar "Big Brother Regal".

Como va con Märtha-Louise? Esque illa ancora es un princessa, o ha illa lassate le monarhica pro devenir parlator-con-angelos professional? ;)

Anonymous said...

GranFratre Regal ... excellente ... que face le princessa Máxima in le armario e proque Madeleine nunquam visita le sauna?

Märtha es "princesssa", ma non "altessa regal" ... un distinction absurde ... io pensa que le princessa, e le pressa, era in chock post le affaires del angelos ... on non plus audi novas quotidian del princessa e nemo plus lege jornales. Io pensa que illa es gravide (o forsan es le princessa hereditari, io non memora) - un nove "infante angelic" ...

Hm, il me sembla que le Se & Hør danese non es identic al Se & Hør norvegian ... In Norvegia le vetule damas lege Se & Hør con photos e rumores del personas famose.

Laurentio said...

"que face le princessa Máxima in le armario e proque Madeleine nunquam visita le sauna?"

E qui de illas va ganiar le sequente batallia de cossinos?! ;)

"Hm, il me sembla que le Se & Hør danese non es identic al Se & Hør norvegian ... In Norvegia le vetule damas lege Se & Hør con photos e rumores del personas famose."

Ben, io non pote jurar que nulle vetule damas jammais lege le Se & Hør danese. Totevia, si illas lo face, illas debe esser preparate a leger novas como "Ecce le ventre de (prince) Henrik - ora mesmo major que antea" o "Joakim, in stato ebrie, molestava juvene pueras in un discoteca" o "Vide le photos del Frederik urinante", etc. (Al minus illes habeva le decentia de celar su "joieles del corona".) :P

Anonymous said...

Interessante. Tu description del S&H danese es conforme con mi impression del S&H norvegian (que io nunquam lege). Dunque, logicamente, vetule damas norvegian non es vetule damas danese ... :-)

Laurentio said...
This comment has been removed by the author.
Laurentio said...

Un logica convincente. Hmm... sequentemente tu va dicer me que parve-matre totevia non es un petra? ;) *)

Ben, io suppone que bastante vetule damas danese anque lege S&H - le appetito de 'gossip' ya non necessarimente decresce con le etate.

Ma in tote caso le magazin ha un profilo bastante juvene - inter altere illes monstra cata septimana photos nude de un "S&H-puera" e un "S&H-viro".

(Ma okay, le appetito de tal imagines ya anque non necessarimente decresce con le etate...)

*) Allusion dramaturgic dano-norvegian