Tuesday, May 19, 2009

TROLL - nove libro in interlingua con message admonitori

Al 14 de maio ancora un libro in interlingua era publicate. Le autor es Åsmund Aukland, le presidente (ora retirate) durante multe annos de Union Norvegian pro Interlingua.

In su libro TROLL Åsmund Aukland communica un admonition grave de alicun habitantes de su area local - le trolles.

Io cita del brochure del libro:

Durante le ultime 100 annos le humanos ha create un situation periculose pro le mundo e su biosphera. Le trolles, un specie ancian, previde un destruction total si le humanos continua lor influentia negative.

Le ignorantia scientific e le arrogantia del humanos es al radices del problemas. Dunque le trollogistas Dr. Seidur e Dr. Sinsano presenta lor sapientia in iste libro in interlingua, anglese e norvegiano. [...] Iste libro anque presenta contos del Osir e Vanir in interlingua.


Vide tote le brochure hic. Illo contine anque un scheda de ordination in interlingua, ma il non es clar pro me como on pote pagar.

In le pagina del libro al sito del casa editorial, Kolofon, il ha plus informationes super illo in norvegiano, e si on comprende iste lingua on anque pote comprar le libro ibi. Ma pro me il non functionava.

Le libro costa NOK 240 (€ 26).

Io es certe que multe homines, e altere esseres del planeta, como io comparti le preoccupation del trolles e es interessate in apprender plus de illos e lor pensatas. Dunque io va tentar de comprar TROLL e va reportar hic super mi experientias con ordinar lo e pagar pro illo.

EDIT: Como promittite io ha describite hic como on pote comprar le libro del extero.

5 comments:

Martein Sveinsson said...

Io commandava le libro Troll sur le sito del casa editorial duo dies retro e lo recipeva per posta hodie. Era nulle problema technic. Le sito es solmente in norvegiano, dunque, se on non comprende le lingua probabilemente es un poco difficil. Io va leger le libro durante le pentecoste. :-)

Laurentio said...

Le problema es que le systema de pagamentos solmente pote manear ordinationes de Norvegia(!). Il ha nulle campo pro indicar un altere pais, e nulle maniera de cambiar le porto. (Le porto es 20 NOK a Norvegia, 40 a Europa, e 65 al resto del mundo.)

Io ha habite un correspondentia assatis longe con le proprietor del casa editorial (un firma 'matre-e-patre' il me pare) ubi io ha essayate de solver iste problemas. Ma ultimemente ille ha cessate responder. :-)

Io mesme ordinava le libro via le sito, indicante (secundo accordo con le proprietor) mi pais in le campo 'andre opplysninger'.

Io recipeva le libro post alicun dies, e hodie io controllava mi systema homebanking.

Como alora habeva illes solvite le problema de porto? Multo simple: Illes non me habeva demandate porto del toto. (Alora io ha recipite le libro 20 NOK plus vil que tu!)

Bon pro me, ma un problema pro Åsmund, qui (io suppone) debe mesme pagar le porto?

Svenni said...

Hm, le porto sembla esser un problema in general. Post haber legite tu commentario, io controllava le informationes de mi carta de credito. Io ha pagate 240 coronas, dunque nulle porto. Io spera que Åsmund non perde moneta a causa de iste systema ...

Laurentio said...

Non me surprende multo. :/

Gratias, io ha scribite un altere e-mail al casa narrante isto.

Osmund Knutson said...

Car Amicos!
Multe gratias pro includer mi libro in vostre paginas.
E multe gratias pro scriber al editor re le problema del pagamento del porto.

Nonobstante, si io perde monetas/pagamento pro que le editor va subtraher le porto, io ha le satisfaction a haber le libro distribuite. Io non crede que isto libro va esser lucrative pro me financialemente, ma io spera que il sera vendite e legite internationalemente.
Con salutes trollic!
Osmund