Tuesday, March 24, 2009

Esque un esperantista pote apprender interlingua in tres dies?

[Edit: Vide le update in basso]

Le responsa forsan va esser date le jovedi veniente.

Le “prehistoria” es isto: Durante le chat de interlingua in IRC le sabbato le 21 de martio le usator “Xxx” era relegate del canal de interlingua (#interlingua) proque ille parlava esperanto in illo. (Como ille habeva facite anque antea malgrado le petitiones de altere usatores.)

Ille era permittite retro in le chat post poc minutas, post haber promittite non plus parlar esperanto ibi. Ma totevia ille era multo infuriate per le affaire, e un grande discussion sequeva in le canal de esperanto (##esperanto) durante le qual Xxx inter altere cuneava cinque nove theses de interlingua non multo flattante.

Post alicun horas de discussion “Xxx” decideva que ille apprenderea interlingua in tres dies, assi que on poterea vider que ille poterea facer lo, post le qual ille lo oblidarea de novo! Lo que isto serea in effecto un grande reclamo pro interlingua non le preoccupava.

Si on vole vider si “Xxx” pote complir su intention, on debe venir al canal #interlingua al servitor de IRC de Freenode. "Xxx" desirava solmente comenciar de apprender interlingua le dominica e dunque promitteva que ille parlarea interlingua fluentemente le jovedi veniente!

Si on non ha un programma de IRC on pote adjunger se al canal per le adresse www.interlingua.com/chat .

(Scribite con le consentimento apriori de "Xxx", cuje supernomine real essera revelate pendente su consentimento final.)

Update (le 25 de martio)

"Xxx" ha hodie informate, que ille debe lassar su urbe alicun dies pro solver un problema familial, e que ille dunque non va poter complir su intention.

Ancora, nos (le grande redaction de Falcatorrosa2) pote forsan dar un responsa al question ponite in le topico: In le chat de interlingua e alterubi nos ha plure vices incontrate personas qui poteva communicar practicamente sin errores post haber studiate interlingua solmente poc dies. Le plus rapide (YYYYYY)(!) chattava in interlingua jam le prime die que ille lo discoperiva, sin ulle errores notabile.

(YYYYY) era justo esperantista!

6 comments:

Petro Ferrero de Hungaria said...

Il es impossibile apprender un lingua (mesmo "auxiliar") intra tres dies. Non mesmo esperanto! Isto es de novo un provocation de esperantistas contra interlingua, que sembla esser typicamente create in lor mentes: illes sempre refere a lo que lor lingua es apprensibile intra breve. Ma anque non esperanto es apprensibile intra un si breve tempore. Isto es solmente a fin que illes pote dicer: Ecce, interlingua non pote esser apprendite intra si breve! E per isto illes vole crear le base a lo que illes pote dicer, que interlingua es difficile (a apprender), dunque: on debe abandonar le idea de apprender lo. Ma pro responder le question del titulo: un esperantista (io era un exemplo a isto in 2003) pote apprender interlingua intra breve - mesmo si non in tres dies, proque ambe le linguas ha plus-minus le commun base lexic: illo greco-latin. In ambe le linguas il non ha conjugation, etc.

Anonymous said...

Jovedi? Non vole tu dicer "Mercuredi"? Il es inusual que io *te* corrige...

Un bon historia, le suspension me occide! Infortunatemente, io non pote participar iste vespere, io debe ir a un evento musical. Totavia, io attende le resultatos!

Laurentio said...

Tom, ben, ille voleva dormir ante que ille comenciava apprender, dunque jovedi, e non mercuridi. :)

Habe un bon evento musical!

Shoshoj, ben nos pote sempre usar (YYYYY) como prova del facilitate de interlingua. :)

Laurentio said...

"ben, ille voleva dormir ante que ille comenciava apprender, dunque jovedi, e non mercuridi"

Hmm, io non es un grande talento matematic, ma post longe deliberation, io ha arrivate al conclusion que si on comencia dominic e face un cosa durente tres dies, on deberea esser preste le mercuridi.

Dunque tu ha ration - il pare haber un "brecha de logica" alicubi.

Ancora, assi era su parolas, si io los comprendeva ben: tres dies, jovedi.

Forsan il era un cosa de zonas temporal. :)

Laurentio said...

*dominica, *durante

(Le corbe de papiro ha disparite!)

Aasmund Olavsson Vinje said...

Io pensa que un esperantista pote apprender interlingua in quatro dies. Al mesme tempore, un interlinguista pote apprender esperanto in cinque dies. Probabilemente, ambe pote apprender toki pona in duo dies.