Wednesday, October 25, 2006

Parlar klingon non es un guasto de tempore

Como multe de vos probabilemente sape, le serie televisori sci-fi “Star Trek” ha causate le nascentia de un lingua construite appellate “Klingon”, que pretende a esser parlate per enthusiastas de tote le mundo. (In le serie Star Trek, le racia 'klingon' es un racia de fer guerreros feroce, con grande frontes ossee.)

In 2005 appareva un film documentari per le director Alexandre Philippe appellate “Earthlings: Ugly Bags of Mostly Water“ (“Terranos – fede saccos de principalmente aqua”). In le film se monstra le enthusiastas de klingon durante un conferentia annual – le “qep'a'“.

In un interview in “Fortean Times” - le magazin pro phenomenos estranie – in septembre, le director defende le “klingonistas”, que ille concipe como multo intelligente in general.

Ille dice: “Le ver question es: Esque io guasta mi tempore facente films? [...] Esque enthusiastas de sport guasta lor tempore vidente football al television? Io pensa que no. Le terra es un placia estranie e nos mesme debe dar signification (“meaning”) a nostre vita. Si il es significative pro illes apprender klingon – proque il es amusante pro illes, proque il es un excellente exercitio mental, o proque illes vole trovar amicos assi - como pote nos dice que illes guasta lor tempore? Io desirea que gente serea plus introspective ante burlar se de trekkies (enthusiastas de Star Trek) o parlatores de klingon. Pro me il non es false facer alique de que on es passionate – specialmente si on non noce a o offende alicuno. [...] Considerante quante personas hodie es passionate de occider le unes le alteres, io pensa que nos non ha le derecto de criticar personas qui opta pro usar lor horas libere a studiar un lingua del spatio exterior.”

Que pensa vos del idea de haber facite un film documentari de nos interlinguistas? Il serea in omne caso un bon maniera de facer plus cognoscite le lingua. Qualcuno vole dar Alexandre Philippe un appello de telephono? :-)

2 comments:

algus said...

Car amico

Le interesse pro interlingua es multo minimal e io ha depost
longemente habite pensatas de finir mi activitates in interlingua.
Ora io ha decidite de clauder mi sitos e blogs in interlingua e
de usar mi tempore remanente ,( io ha trosto 77 annos), a acivitates
que ha un futuro.
Gratias pro tu participation in mi sito e io desira le interlingua e su
usatores un bon futuro.
Alf

Lars said...

Car Alf

Io es multo triste audir tu novas, ben que io naturalmente accepta tu desicion. (Io ya non ha ulle alternativa.) ;)

Tu e tu sitos va certo esser multo mancate in le mundo electronic de interlingua.

Io spera que tu va totevia "remaner in contacto" con nos a un certe grado.

Amicalmente
Lars