Monday, June 15, 2009

Le libro TROLL se vende in internet - con transporto gratuite


Post un longe correspondentia con le casa editorial Kolofon il ha devenite clar que TROLL per Osmund Aukland pote esser comprate e pagate del sito web del libro, anque per personas qui non vive in Norvegia.

Un instruction de como comprar pro personas qui non comprende norvegiano se trova hic.

Le precio del libro es 240 NOK (le qual al hora de scriber corresponde a 26,86 EUR, 36,93 USD, e 22,64 GBP). Pro facer le message del libro attinger tante personas como possibile, Osmund Aukland e le trolles ha decidite mesme pagar le porto! Le 240 NOK dunque es toto que on debe pagar.

Le co-autor Dr. Seidur durante un del lectiones de trollogia del libro.

Thursday, May 28, 2009

Impressiones de Wolfram Alpha

Vos sape probabilemente de Wolfram Alpha- le nove motor de recerca de informationes que alicunos ha nominate un "assassino de Google" possibile.

On lo pone un question e illo lo interpreta per maniera quasi-intelligente e recerca le responsa in su bases enorme de datas.

Quando io audiva de iste motor meraviliose io subito memorava un multitude de questiones cuje responsas io non plus poteva carer. Ma infortunatemente il habeva certe barrieras de comprension inter me e le motor.

Le question "how much dna does homo sapiens have in common with chimpanzees?" dava le responsa "Wolfram|Alpha isn't sure what to do with your input."

Ben, iste question anque era un poco ambitiose.

"in what year was Mozart's first symphony composed?" dava le mesme resultato. Como anque faceva altere formulationes como "Mozart first symphony year", e mesmo "Mozart, first symphony".

Altere questiones tractava:

Geographia: "What is the second largest city in Denmark", "What is the second biggest city in Denmark", "Denmark city second highest population" (totes non comprendite)

(Ben, io es assatis certe que il es Århus.)

Zoologia: "Is a spider an insect?" Incoragiantemente WA sapeva le responsa (no). Ma non poteva adjutar me con "can a bumblebee fly?", "animals that can fly", "what animals can fly", o "what animals fly".

Alora io era sasite per le desiro de saper qual papilion es le major. Ma 10-15 formulationes differente dava le resultato usual.

Io anque probava le sapientia de Wolfram Alpha in le campos de

Astronomia: "how far away is the sun?" - "1.014 AU", "how hot is the sun" - "5780 K" (ma isto solmente es al superficie), "nearest/closest star" - a vices illo responde "le sol", a vices "Proxima Centauri".

Societate: "number one cause of death USA" non comprendite, "13th president of the USA" - non comprendite, ma (estraniemente) "thirteenth president of the USA" - "Millard Fillmore".

Evolution: "homo sapiens ancestors" - (dava le resultato "Wolfram|Alpha quo ad hoc, illiud Latine dici non potest."!),

Linguistica: where is French spoken?

Interlinguistica - le resultatos non era multo incoragiante pro le interlinguistas de IALA:

"What is interlingua" - ("number of native speakers: extinct, place of origin | France")

"What is esperanto" - ("total number of speakers: 2 million people, place of origin: France")

Tote linguas auxiliar veni de Francia? Io probava le hypothese:

"What is volapük?" - le responsa: "margined flyingfish (animal)"

Conclusion: In le futuro proxime io va continuar a cercar informationes per Google e en.Wikipedia. Ma con le tempore Wolfram Alpha pote devenir un supplemento utillissime, e Il va esser interessante sequer su evolution. Quando le computatores rebelle contra le humanos e prende le poter, forsan le instigator non va esser le robotes de Google, ma Wolfram Alpha?



Tuesday, May 19, 2009

TROLL - nove libro in interlingua con message admonitori

Al 14 de maio ancora un libro in interlingua era publicate. Le autor es Åsmund Aukland, le presidente (ora retirate) durante multe annos de Union Norvegian pro Interlingua.

In su libro TROLL Åsmund Aukland communica un admonition grave de alicun habitantes de su area local - le trolles.

Io cita del brochure del libro:

Durante le ultime 100 annos le humanos ha create un situation periculose pro le mundo e su biosphera. Le trolles, un specie ancian, previde un destruction total si le humanos continua lor influentia negative.

Le ignorantia scientific e le arrogantia del humanos es al radices del problemas. Dunque le trollogistas Dr. Seidur e Dr. Sinsano presenta lor sapientia in iste libro in interlingua, anglese e norvegiano. [...] Iste libro anque presenta contos del Osir e Vanir in interlingua.


Vide tote le brochure hic. Illo contine anque un scheda de ordination in interlingua, ma il non es clar pro me como on pote pagar.

In le pagina del libro al sito del casa editorial, Kolofon, il ha plus informationes super illo in norvegiano, e si on comprende iste lingua on anque pote comprar le libro ibi. Ma pro me il non functionava.

Le libro costa NOK 240 (€ 26).

Io es certe que multe homines, e altere esseres del planeta, como io comparti le preoccupation del trolles e es interessate in apprender plus de illos e lor pensatas. Dunque io va tentar de comprar TROLL e va reportar hic super mi experientias con ordinar lo e pagar pro illo.

EDIT: Como promittite io ha describite hic como on pote comprar le libro del extero.

Sunday, May 17, 2009

Collaboratores necessitate pro un systema de foros de interlingua

In infra es un message que io scribeva le altere die. Io lo inviava a tote le listas de e-posta de interlingua que io poteva trovar, ma oblidava publicar lo in mi proprie blog!


le 11 de maio

Car totes,

Io va tosto inaugurar un nove sito web pro interlinguistas.

Le contento principal del sito essera un grande systema de foros web pro interlinguistas e interessatos.

Con "foros web" io pensa non a listas de e-posta como Interlng, Iaforum, ApIA, etc., ma a foros placiate directemente in un sito del WWW, propulsate per linguas de scripting como PHP, etc. Concretemente le foro va usar le solution de foros phpBB.

Foros web ha multe avantages, le plus importante essente le possibilitate de crear subforos secundo thema. In plus, il es multo facile registrar e connecter se con un tal foro, on pote modificar e mover le messages post que illos ha essite inviate, on pote insertar imagines in illos e on pote facer votationes, pro solmente mentionar alicun poc cosas.

Un tal systema de foros es un modo de communicar multo plus dynamic que listas de e-posta, e il es mi sperantia que le sito potera contribuer a vivificar le communication electronic del interlinguistas.

Ben que iste solution essera multo plus facile a usar pro le membros, illo exige multissimo plus labor pro le gerente(s) que un lista de e-posta. Inter altere cosas, ante que le sito pote esser inaugurate tote le texto del interfacie de usator debe esser traducite in interlingua. (In un foro de interlingua, anque le messages de error debe naturalmente esser in interlingua, nonne?) :-)

Io ha jam traducite circa 2000 messages del interfacie, ma il manca plure milles. E ben que io ha fruite del consilios lingual de plure interlinguistas (super toto Martijn Dekker e Josu Lavin) e del incoragiamento e promissa de adjuta de Daniel Hollande, il durara probabilemente ancora multe tempore ante que le traductiones potera esser preste. Ma le participation active de plus interlinguistas experte poterea considerabilemente accelerar le processo!

Anque post le inauguration del sito vostre adjuta essera indispensabile. Primo il debe haber moderatores pro le varie subforos del sito. E pro vermente exploitar le possibilitates technic del systema, le collaboration de personas experte in PHP, SQL o con experientia general con le gerentia de sitos web, serea un grande avantage.

Dunque, si tu es interessate in adjutar con e/o le aspectos lingual e/o technic, o ha ulle ideas, suggestiones, questiones o commentarios in general, per favor responde hic - o al adresse lars.rosenmeier (coclea) gmail.com.

In fin io pote narrar que io ha jam comprate le nomine dominio (domain name) pro le sito, ma io non vole publicar lo ante que illo es usabile. Dunque si tu es un de illes al quales io jam ha revelate le adresse, per favor non ancora mentiona lo in public. :-)

Amicalmente,
Lars


--
http://falcatorrosa2.blogspot.com
*
Ask not what you can do for your conlang - ask what your conlang can do for you

Wednesday, May 06, 2009

Traductores anglese-interlingua besoniate/necessitate

Io es facente un version in interlingua del software de foros Phpbb. Ma il ha tante texto a traducer que io pensa que il me durara plure annos!

Dunque si ulle lectores voleva adjutar, il serea multo benvenite. Contacta me per e-mail o scribe un commento hic.

Thursday, April 09, 2009

Nove chat de interlingua de IALA

Io ha ora create un nove chat de Skype specificamente pro parlatores de interlingua de IALA (e le parlator de romanica). :-)

Le chat non es affiliate con ulle organisationes o fractiones de interlingua.

Per favor, corrige solmente errores de alteres post lor invitation explicite.

Pro entrar le chat, on debe haber le programma Skype e clicca hic.

NB! Il pare que usatores del version le plus nove de Skype (v. 4...), non pote entrar in chats public via ligamines. Dunque ille usatores debe esser addite al chat per un del participantes jam in le chat. Dunque, si tu usa Skype v. 4... e vole participar in le chat, contacta me in Skype, ubi mi nomine de usator es "larsrosenmeier".

Sunday, April 05, 2009

Nove chat auxlingual

Proque le atmosphera pote a vices parer un poco troppo "ursin" in le chat de interlingua in Skype, io ha ora create un canal alternative.

Como le altere chat, il es permittite scriber é in linguas auxiliar, é linguas "natural".

Pro adjunger se al chat, on debe haber le programma gratuite Skype e cliccar hic!

In caso de problemas con entrar le chat, contacta me in Skype (larsrosenmeier).

Wednesday, April 01, 2009

Til balde, amicos! - le chat de Skype deveni inter-auxlingual

In le plus que tres menses que io ha essite ligate a un chaise rolante, io ha passate mesmo plus tempore al computator que io soleva. Inter altere cosas io ha participate multo in le duo chats public de interlingua que existe in le rete. Le un es de chat de IRC, que io mentionava in le ultime articulo (#interlingua in le servitor Freenode - anque accessibile de www.interlingua.com/chat; moderate per Péter Kovács. Le chances de trovar co-chattantes es le melior le mercuridi e sabbato vespere).

Le altere es le chat de Skype, create per Josu Lavin - lege plus hic super como entrar lo. Ben que le lingua normalmente usate in le chat es interlingua de IALA, il es permittite scriber tamben in tote altere linguas existente. Le chat es dunque un bon loco pro interlinguistas qui vole haber lor horizontes allargate un poco. Inter le chattantes regular un trova assi Claudio Marcon, le sol remanente usator del lingua auxiliar Romanica - un lingua cuje vocabulario es identic con le de interlingua, ma con un grammatica plus natural/romanic.

Recentemente alicun idistas ha comenciate usar le chat tamben. In general le communication inter le interlinguistas/romanichista e le idistas ha passate sin grande problemas e ambe gruppos ha gaudite que illes pote comprender le altere lingua sin haber studiate lo.

Compare hic le vocabularios del duo linguas - como on vide, illos es quasi identic, e le differentia es plus tosto debite al grammatica - le de ido es multo structurate con multe affixos productive.

Anque alicun esperantistos visita a vices le chat, e anque le communication con illes ha essite sin major problemas, ben que le vocabulario de esperanto es plus distante de interlingua que le de ido.

In mi opinion il es multo positive vider iste parve passos verso 'fraternalisation' del varie linguas auxiliar, cuje adherentes a vices monstra tendentias a sectarismo e intolerantia del altere linguas. Un situation que es tanto plus deplorabile proque multe del linguas auxiliar es basate al mesme vocabulario international e es a un multo alte grado mutualmente intelligibile. (Como Alexander Gode mesme scribeva, linguas como interlingua de IALA, interlingua de Peano, interlingue, ido, etc. es vermente dialectos del mesme lingua.)

Tuesday, March 24, 2009

Esque un esperantista pote apprender interlingua in tres dies?

[Edit: Vide le update in basso]

Le responsa forsan va esser date le jovedi veniente.

Le “prehistoria” es isto: Durante le chat de interlingua in IRC le sabbato le 21 de martio le usator “Xxx” era relegate del canal de interlingua (#interlingua) proque ille parlava esperanto in illo. (Como ille habeva facite anque antea malgrado le petitiones de altere usatores.)

Ille era permittite retro in le chat post poc minutas, post haber promittite non plus parlar esperanto ibi. Ma totevia ille era multo infuriate per le affaire, e un grande discussion sequeva in le canal de esperanto (##esperanto) durante le qual Xxx inter altere cuneava cinque nove theses de interlingua non multo flattante.

Post alicun horas de discussion “Xxx” decideva que ille apprenderea interlingua in tres dies, assi que on poterea vider que ille poterea facer lo, post le qual ille lo oblidarea de novo! Lo que isto serea in effecto un grande reclamo pro interlingua non le preoccupava.

Si on vole vider si “Xxx” pote complir su intention, on debe venir al canal #interlingua al servitor de IRC de Freenode. "Xxx" desirava solmente comenciar de apprender interlingua le dominica e dunque promitteva que ille parlarea interlingua fluentemente le jovedi veniente!

Si on non ha un programma de IRC on pote adjunger se al canal per le adresse www.interlingua.com/chat .

(Scribite con le consentimento apriori de "Xxx", cuje supernomine real essera revelate pendente su consentimento final.)

Update (le 25 de martio)

"Xxx" ha hodie informate, que ille debe lassar su urbe alicun dies pro solver un problema familial, e que ille dunque non va poter complir su intention.

Ancora, nos (le grande redaction de Falcatorrosa2) pote forsan dar un responsa al question ponite in le topico: In le chat de interlingua e alterubi nos ha plure vices incontrate personas qui poteva communicar practicamente sin errores post haber studiate interlingua solmente poc dies. Le plus rapide (YYYYYY)(!) chattava in interlingua jam le prime die que ille lo discoperiva, sin ulle errores notabile.

(YYYYY) era justo esperantista!

Saturday, August 23, 2008

Radio Interlingua revivificate

Hodie Radio Interlingua ha essite officialmente relanceate. Le 'revivificator' es le antementionate Sr. Kovács, qui ha laborate multo diligentemente con le projecto desde longe.

Lege plus, e audi le prime emission a su blog.

Péter anque ha facite un interview con me, ma il pare que illo non ancora es toto publicabile (il es possibile que io poterea haber essite melio preparate!). Alora vos debe esser patiente, si vos desira audir mi gemmas de sagessa. ;)

Friday, August 22, 2008

Le incontro nordic 2008

Le incontro nordic habeva loco desde quasi un mense, e post mi retorno a casa io ha sovente volite publicar alcun photos e videos de illo, ma mi pigressa ha vincite cata vice. Ma ora Péter Kovács me ha inspirate a comenciar per postar alcun photos a su blog del viage a casa post le incontro.



Io incontrava ille e mi compatriota Klavs Neerbek al station ferroviari de Linköping, ubi illes habeva attendite lor trainos durante plure horas.



Post haber prendite un photo de Klavs e me, Péter comenciava photographar trainos (e Klavs e io debeva admitter que illos era un motivo plus belle que nos).

Io va postar plus photos plus tarde, ma si vos non pote attender (improbabile) vos pote trovar alcun in le web con un poco de astutia).

Tuesday, July 15, 2008

Le prime entrata blog

Forsan un poco tarde post duo annos e quatro menses, ma ci io vos da mi prime ver entrata "blog" - como vos sape, blog significa vermente un diario electronic.

Io ha essite malade ora desde tres septimanas con alcun infection de gorga. Le prime duo septimanas illo se manifestava solmente como dolores (e un abundantia de muco) de gorga, ma in le ultime circa cinque dies illo ha essite como un ver rheuma/frigido/grippe/flue ubi le dolores (e le muco!) se ha trovate anque in le naso! Io debe haber consumite un parve foreste per sufflar lo durante le ultime dies.

Il non habeva ulle bacterias a trovar quando io visitava le medico post cinque dies de maladia. Deman io va al medico (re un altere cosa) e vole anque consultar les del maladia de novo.

Notas linguistic: 1) Io pensa que multe gente non cognosce le differentia inter un rheuma/cold/forkølelse/Erkältung e un grippe/flue/influenza - le ultime porta con se febre e sole durar solmente alcun dies, ma le prime tende a durar plus longe tempore. Totevia si on dice que on ha le rheuma nemo prende uno seriose, ma pensa que un es un "cauda debile" si on remane a casa. ("Cauda debile": interlinguification del magnific parola danese/germano "slapsvans"/"Schlappschwanz").

2) Io non del toto me senti convincite que le parola del IED "frigido" pro "cold" es un reflexion correcte del nomine del maladia "cold" in le linguas fonte - dunque io anque sole scriber sempre "rheuma". Con "frigido" Sr. Gode e su collegas ha forsan plus tosto pensate al sensation de frigor, e non al maladia viral.

"Sur un nota differente" io ha cambiate le subtitulo del blog a "Interlingua - proque nos ama linguas!". Isto es pro me le sol causa realistic pro occupar se con interlingua (o ulle altere lingua construite/auxiliar). Le mundo non pote jammais essser salvate per un lingua, ma si illo pote dar alcun gaudio a su parlatores, illo ya anque non ha vivite in van (pro si dicer).

Wednesday, July 09, 2008

Crampa de papiros irritante

Post haber laborate con MSWord (e haber essite molestate per su assistente - le crampa de papiro), io googlava >>annoying paper clip<<.


Del 1.230 resultatos, le prime esseva isto:

Monday, June 16, 2008

Esbjörn Svensson morite

Le svedese pianista jazz Esbjörn Svensson moriva sabbato le 14 de junio 2008 in un accidente de immersion scuba a Ingarö apud Stockholm. Ille lassa un sposa e duo infantes.

Esbjörn Svensson obteneva fama international in circulos de jazz como gerente de Esbjörn Svensson Trio (E.S.T.), fundate 1990. Illes sonava un stilo de jazz moderne e innovative, sovente imprestante de altere generes, que appellava inter altere a multe juvenes.

Ci E.S.T. sona “Dodge the Dodo” del album “From Gagarin's Point of View” de 1999.

Quiesce in pace.

Saturday, June 14, 2008

Stato post venerdi le 13

Esque le venerdi le 13 justo passate ha essite tanto infortunate como on poteva timer? Que nos percurre alcun eventos que ha habite loco:


Nederland ha vincite Francia con 4-1 in le Cuppa Europee de football.


Microsoft Zune ha essite lanceate in Canada.


Le sud de Norvegia ancora es tormentate per incendios forestal, ma secundo mi comprension del pressa nulle humanos ha perite in illos, e le bulletin meteorologic promitte pluvia.


Centos de prisioneros militante ha essite liberate per soldatos de Tlaiban; in China 34 minatores es confinate in un mina, e in Russia 60 personas ha essite vulnerate in un accidente ferroviari.


Finalmente, in Irlanda le population disobediente ha habite le audacia de refusar le tractato de Lisbona, que politicos in tote altere paises del UE ha o habera ratificate sin informar lor populationes de que involve le tractato o mesmo demandar les que illes pensa de illo.


Un die infortunate o non? Que dice le jury? :-)

Wednesday, June 04, 2008

Re bombas e condemnationes

On dice que on pote judicar quanto sincer es un apologia, per notar si illo es succedite per un “ma”. Pro exemplo, un apologia como “Io regretta que io furava tu auto, ma il era anque tu proprie falta, proque tu lassava le clave in le ignition” non pare multo sincer, e a pena pote esser acceptate como un ver expression de repententia.

Le mesme regula es usabile pro judicar declarationes de condemnation de atrocitates, como le bombar del ambassada danese in Islamabad anteheri.

Como anque antea, post le homicidio del inscenator nederlandese T. van Gogh, e le planos de assassinar le designator K. Westergaard, on pote vider que multe condemnationes es in effecto succedite per un “ma”.

Pro exemplo ha un association jordanian, “Le currero nos uni”, publicate un declaration condemnante le “uso categoric de violentia in responsa de attaccos systematic a Islam e le propheta” “Ma le autoritates danese debe assumer le major parte del responsabilitate de lor fallimento de introducer regulationes discoragiante contra le medios danese, que provoca le sentimentos musulman.

Un editorial in le jornal Khaleej Times del Emirates Unite, anque condemna le bomba, “que ha nihil a facer con islam”. “Ma al mesme tempore il es un communication a paises como Danmark, que il es mal e directemente periculose attaccar le fide de alteres in le nomine del libertate”.

Le jornal pakistani “The Post” anque condemna le attentato, ma adde que “le Occidente debe comprender que le libertate de expression non permitte violar le sentimentos de milliones de personas. (Fonte: eb.dk.)

Al altere latere, anque condemnationes sin reservationes ha essite publicate, pro exemplo per le capite religiose influential al-Qaaradawi, un del originatores del protestos in 2006.

Anque le Societate Religiose Musulman danese scribe in lor sito web, que il es totalmente inacceptabile, e justificabile per nihil, que le ambassada esseva attaccate.

Octo personas esseva occidite in le attacco, que probabilemente esseva causate per furia del designos de Muhammed, particularmente illo depingente ille con un bomba in le turban.

Monday, May 26, 2008

Quiz de citationes de films

Inspirate per le citationes de films in Panorama per Richard Sorfleet, hic es un parve quiz pro vos. Tote enunciationes dicite in le lingua del film ha essite traducite a interlingua. Si on pote divinar tote octo films, on gania ... ben nihil, infortunatemente (ultra le honor).

Quante pote vos divinar? Per favor, scribe vostre conjecturas in un commentario.

Ecce le citationes:

1. "No, IO es tu patre.

2. "Forsan il ha crema anti-rugas, ma il non ha crema "anti-bastardo-grasse"

3. "Io es un chauffeur excellente."

4. "Not yet, cameradas, not yet!"

5. " - Si mercede es demandate ...
- Nulle mercede va esser demandate.
- O date."

6. " - Tote vos es individual
- SI, TOTE NOS ES INDIVIDUAL"

7. "Io non plus pote esser inactive e permitter infiltration communista, introduction communista, subversion communista, e le conspiration international communista pro exhaurir nostre preciose fluidos corporal."

8. "Quando io esseva institutionalisate, mi cerebro esseva studiate comprehensivemente per le typos del 'sanitate mental'. Io esseva interrogate, io esseva radiographate, io esseva examinate profundemente. Alora, illes prendeva toto concernente me e lo poneva a in un computator ubi illes creava iste modello de mi mente. Si! Usante ille modello illes succedeva generar tote pensata que io poterea possibilemente pensar in le proxime, ben, 10 annos."

Saturday, May 24, 2008

Le monarchia danese

Durante que le major stationes televisive danese reporta del nuptias de prince Joachim e Marie Cavallier tote le die, io vos presenta alcun informationes del monarchia danese, e alcun reflexiones super su ration de esser.

Le rege danese Frederik le Septime (1808-1863) esseva un homine tranquille e demotic, alora al 21 de martio 1848, quando un demonstration con 15.000 homines, guidate per le politico Orla Lehman, presentava al rege un adresse demandante democratia, ille lo simplemente acceptava.

Dunque le democratia danese nasceva sin que un sol unda de sanguine esseva effundite, e al 5 de junio le proxime anno Danmark habeva su prime constitution democratic - le “Grundlov”.

Il esseva un decision sage per rege Frederik, qui non solmente evitava esser decapitate, como es le costume durante revolutiones, ma anque reteneva un poc de potentia (Danmark esseva solmente completemente democratic in 1901.)

Alora il es gratias al sagessa de Frederik, que Danmark ancora es un monarchia post 160 annos. In nostre era illuminate, stante al summitate de saper e scientia, IT, e technologia genetic, nos ancora ha un familia regal, qui porta coronas, vive in castellos, e transversa le urbes in carrossas auree a occasiones festive. E illo es plus popular que jammais antea.

Nostre regina currente, Margrethe, nos ha guidate desde 1972. Su familia consiste de su sposo prince consorte Henrik (anteriormente conte Henri de Monpezat de Francia) e lor infantes prince hereditar Frederik, e prince Joachim. Joachim es, qui hodie se marita (pro le secunde vice) con le francese Marie Cavallier.

Le familia regal es amate per le (majoritate del) populo, particularmente le regina e le prince hereditar. Le prince consorte al altere latere pare esser un poco minus popular, forsan inter altere proque ille post quaranta annos in Danmark non ancora pote parlar danese solmente partialmente correcte, e proque ille ha declarate que ille soleva castigar su filios “como cavallos e canes”. Ma assi es ya le circumstantias - le familia regal sta super le lege, e on non pote expectar que illes omitte batter su infantes, como es requirite per le lege le resta del population.

Ultra esser un fumator ardente, nostre regina non es le figura jovial e demotic, como esseva p.ex. su patre Frederik le None, le rege marinero qui esseva cognoscite pro su multe tatus. Per contrasto, illa e su familia pare ambir se exclusivemente con personas aristocratic o multo ric, e solmente incontra le populaceo durante le visitas official in varie urbes, que illa debe facer alcun vices cata anno.

Similemente, quando le regina recipe visitantes pro le “Nytårskur” (le celebrationes del nove anno), il es clar que solmente personas ric o distinguite pote esser invitate, justo como solmente tal personas pote esser considerate pro esser innobilite. Le regina ha explicate in intervistas, que isto non es antidemocratic, nam tote personas in nostre societate ha *possibilitates* equal de devenir ric o distinguite.

Ben que il forsan non es multo cortese a iste die festive, on poterea ya demandar se, perque nos ancora hodie debe haber iste institution antiquate que es le monarchia, e si nos es adequatemente reimbursate pro le multe milliones de coronas que nos cata anno paga al sustenentia luxuose de iste poc personas.

Un argumento que on sempre audi demandante iste question, es que le monarchia ha un influentia positive al economia danese - e il es anque ver que membros del familia sovente participa in ferias mercantil e altere eventos ubi illes pote beneficiar le exportation de grande interprisas. Ma in iste dies ubi placias de labor de plus in plus es movite (“outsourced”) al extero, on pote ya demandar se si le reclamo regal vermente beneficia le populo integre, o solmente le actioneros del interprisas.

Un gruppo que vermente es beneficiate per le monarchia es le pressa “colorate”, que sempre ha bon historias a imprimer re le familia regal. P.ex. il ha le cartel de pressa gigante “Aller Press A/S”, que inter multe altere magazines possede “Billed-Bladet” - que consiste quasi solmente de historias elogiose del familia, e “Se & Hør” que ha como su specialitate imprimer historias irreverente de illo.

Finalmente nos naturalmente non debe oblidar le multissime personas qui se gaude per admirar le familia regal. Como actores e cantatores, illes da un poco de brillantia e fabula al vita enoiose de multes.

Si on non pertine a un del tres gruppos mentionate, il pote esser difficile vider le utilitate del monarchia.

In mi opinion le solution es simple. Illes que le monarchia beneficia pote anque mesme pagar pro illo. In Danmark, tote membros del ecclesia popular (statal) debe pagar taxas ecclesiastic. Ma si on se retira del ecclesia on es exemptate del taxas.

Proque non facer le mesme con le monarchia? Totes qui ha (o crede haber) ulle beneficio del monarchia, pote esser “membros del monarchia” e pagar “taxas monarchista”.

E illes qui non vide le utilitate del monarchia, o qui forsan mesmo lo considera un institution antiquate e ridicule, poterea retirar se de illo.

Le monarchia certo superviverea un tal arrangiamento, viste que illo es tanto popular.

Un tal systema es naturalmente politicamente inimaginabile hodie. Ma in le proxime 50 annos le composition ethnic de Danmark se cambiara sin dubita profundemente. Il sera interessante vider que occurre con le monarchia in iste periodo transitori.


Le addition le plus recente al familia regal

Thursday, May 08, 2008

Johannes le phoca

- conto humosophic per Bjarne Hosbo

(Imprimite con le permission del autor.)


Il habeva olim un phoca mysteriose. Illo similava plus a un homine que a un phoca. Illo poteva anque parlar e portar habito e facer su compras al Magazin du Nord. Ma tamen illo esseva un phoca.

Illo similava a un homine sur le exterior – e habeva anque un nomine completemente ordinari: Johannes Jokumsen-Jørlunde. Le problema esseva: Geneticamente Jokumsen esseva un phoca. Dunque ille non poteva haber infantes con su sposa.

Sed ille poterea facilemente copular con un phoca feminin. Tamen ille non faceva isto, nam ille non sapeva que ille esseva un phoca.

Su parentes habeva essite ordinate non contar isto a ille. Pois alora le infante poterea haber complexos – e possibilemente sensationes infortunate, quando ille esseva in le jardin zoologic.

Tamen le sposa Jonna Jokumsen parturiva non minus que tres infantes san e brave – que in nulle maniera resimilava un phoca.

Como poteva illo occurrer?

Proque seniora Jokumsen esseva un dama multo social, qui con placer participava in omne le gaitates de su loco de labor, Joco & Nonsenso, in Loco del Riso - como prandios de Natal, jubileos, picnics, etc. E tal cosas pote haber resultatos multo fertile.

Un die in le calide estate de 1992 le familia esseva foras pro baniar se in le Golfo del Lamento. Johannes amava natar, e se moveva poco a poco plus e plus longe ab le plagia. Subito ille esseva absente. Le sposa e le infantes essayava reguardar le. Sed illes videva solmente duo phocas, qui se moveva in le undas in un joco de copular vivace.


Nove sitos in interlingua

Hic es alcun nove sitos de interlingua, que non mesmo Martein Sveinsson pare haber discoperite. ;)

Le sito de Lingox - de Finlandia - un senior con su proprie opiniones le quales ille non time divulgar. :P Le sito contine inter altere cosas un blog.

Le blog de Cryp - de Italia. Primarimente in italiano, ma con plure entratas in interlingua, o con summarios in interlingua.

Jam ha essite publicate alterubi le blog personal de

Daniel H. - de Anglaterra,

e le canal de Youtube de Hyperlingua - con un version in audio del Curso de Conversation per Harleigh Kyson Jr., narrate per un robot. Le autor del canal anque ha un sito re interlingua in germano, con un curso.