Falcatorrosa

Le libro TROLL se vende in internet - con transporto gratuite

2009-06-15T23:09:00.004+02:00

Post un longe correspondentia con le casa editorial Kolofon il ha devenite clar que TROLL per Osmund Aukland pote esser comprate e pagate del sito web del libro, anque per personas qui non vive in Norvegia.

Un instruction de como comprar pro personas qui non comprende norvegiano se trova hic.

Le precio del libro es 240 NOK (le qual al hora de scriber corresponde a 26,86 EUR, 36,93 USD, e 22,64 GBP). Pro facer le message del libro attinger tante personas como possibile, Osmund Aukland e le trolles ha decidite mesme pagar le porto! Le 240 NOK dunque es toto que on debe pagar.

Le co-autor Dr. Seidur durante un del lectiones de trollogia del libro.

Impressiones de Wolfram Alpha

2009-05-28T19:42:00.004+02:00

Vos sape probabilemente de Wolfram Alpha- le nove motor de recerca de informationes que alicunos ha nominate un "assassino de Google" possibile.

On lo pone un question e illo lo interpreta per maniera quasi-intelligente e recerca le responsa in su bases enorme de datas.

Quando io audiva de iste motor meraviliose io subito memorava un multitude de questiones cuje responsas io non plus poteva carer. Ma infortunatemente il habeva certe barrieras de comprension inter me e le motor.

Le question "how much dna does homo sapiens have in common with chimpanzees?" dava le responsa "Wolfram|Alpha isn't sure what to do with your input."

Ben, iste question anque era un poco ambitiose.

"in what year was Mozart's first symphony composed?" dava le mesme resultato. Como anque faceva altere formulationes como "Mozart first symphony year", e mesmo "Mozart, first symphony".

Altere questiones tractava:

Geographia: "What is the second largest city in Denmark", "What is the second biggest city in Denmark", "Denmark city second highest population" (totes non comprendite)

(Ben, io es assatis certe que il es Århus.)

Zoologia: "Is a spider an insect?" Incoragiantemente WA sapeva le responsa (no). Ma non poteva adjutar me con "can a bumblebee fly?", "animals that can fly", "what animals can fly", o "what animals fly".

Alora io era sasite per le desiro de saper qual papilion es le major. Ma 10-15 formulationes differente dava le resultato usual.

Io anque probava le sapientia de Wolfram Alpha in le campos de

Astronomia: "how far away is the sun?" - "1.014 AU", "how hot is the sun" - "5780 K" (ma isto solmente es al superficie), "nearest/closest star" - a vices illo responde "le sol", a vices "Proxima Centauri".

Societate: "number one cause of death USA" non comprendite, "13th president of the USA" - non comprendite, ma (estraniemente) "thirteenth president of the USA" - "Millard Fillmore".

Evolution: "homo sapiens ancestors" - (dava le resultato "Wolfram|Alpha quo ad hoc, illiud Latine dici non potest."!),

Linguistica: where is French spoken?

Interlinguistica - le resultatos non era multo incoragiante pro le interlinguistas de IALA:

"What is interlingua" - ("number of native speakers: extinct, place of origin | France")

"What is esperanto" - ("total number of speakers: 2 million people, place of origin: France")

Tote linguas auxiliar veni de Francia? Io probava le hypothese:

"What is volapük?" - le responsa: "margined flyingfish (animal)"

Conclusion: In le futuro proxime io va continuar a cercar informationes per Google e en.Wikipedia. Ma con le tempore Wolfram Alpha pote devenir un supplemento utillissime, e Il va esser interessante sequer su evolution. Quando le computatores rebelle contra le humanos e prende le poter, forsan le instigator non va esser le robotes de Google, ma Wolfram Alpha?

TROLL - nove libro in interlingua con message admonitori

2009-05-19T02:22:00.009+02:00

Al 14 de maio ancora un libro in interlingua era publicate. Le autor es Åsmund Aukland, le presidente (ora retirate) durante multe annos de Union Norvegian pro Interlingua.

In su libro TROLL Åsmund Aukland communica un admonition grave de alicun habitantes de su area local - le trolles.

Io cita del brochure del libro:

Durante le ultime 100 annos le humanos ha create un situation periculose pro le mundo e su biosphera. Le trolles, un specie ancian, previde un destruction total si le humanos continua lor influentia negative.

Le ignorantia scientific e le arrogantia del humanos es al radices del problemas. Dunque le trollogistas Dr. Seidur e Dr. Sinsano presenta lor sapientia in iste libro in interlingua, anglese e norvegiano. [...] Iste libro anque presenta contos del Osir e Vanir in interlingua.

Vide tote le brochure hic. Illo contine anque un scheda de ordination in interlingua, ma il non es clar pro me como on pote pagar.

In le pagina del libro al sito del casa editorial, Kolofon, il ha plus informationes super illo in norvegiano, e si on comprende iste lingua on anque pote comprar le libro ibi. Ma pro me il non functionava.

Le libro costa NOK 240 (€ 26).

Io es certe que multe homines, e altere esseres del planeta, como io comparti le preoccupation del trolles e es interessate in apprender plus de illos e lor pensatas. Dunque io va tentar de comprar TROLL e va reportar hic super mi experientias con ordinar lo e pagar pro illo.

EDIT: Como promittite io ha describite hic como on pote comprar le libro del extero.

Collaboratores necessitate pro un systema de foros de interlingua

2009-05-17T17:48:00.002+02:00

In infra es un message que io scribeva le altere die. Io lo inviava a tote le listas de e-posta de interlingua que io poteva trovar, ma oblidava publicar lo in mi proprie blog!

le 11 de maio

Car totes,

Io va tosto inaugurar un nove sito web pro interlinguistas.

Le contento principal del sito essera un grande systema de foros web pro interlinguistas e interessatos.

Con "foros web" io pensa non a listas de e-posta como Interlng, Iaforum, ApIA, etc., ma a foros placiate directemente in un sito del WWW, propulsate per linguas de scripting como PHP, etc. Concretemente le foro va usar le solution de foros phpBB.

Foros web ha multe avantages, le plus importante essente le possibilitate de crear subforos secundo thema. In plus, il es multo facile registrar e connecter se con un tal foro, on pote modificar e mover le messages post que illos ha essite inviate, on pote insertar imagines in illos e on pote facer votationes, pro solmente mentionar alicun poc cosas.

Un tal systema de foros es un modo de communicar multo plus dynamic que listas de e-posta, e il es mi sperantia que le sito potera contribuer a vivificar le communication electronic del interlinguistas.

Ben que iste solution essera multo plus facile a usar pro le membros, illo exige multissimo plus labor pro le gerente(s) que un lista de e-posta. Inter altere cosas, ante que le sito pote esser inaugurate tote le texto del interfacie de usator debe esser traducite in interlingua. (In un foro de interlingua, anque le messages de error debe naturalmente esser in interlingua, nonne?) :-)

Io ha jam traducite circa 2000 messages del interfacie, ma il manca plure milles. E ben que io ha fruite del consilios lingual de plure interlinguistas (super toto Martijn Dekker e Josu Lavin) e del incoragiamento e promissa de adjuta de Daniel Hollande, il durara probabilemente ancora multe tempore ante que le traductiones potera esser preste. Ma le participation active de plus interlinguistas experte poterea considerabilemente accelerar le processo!

Anque post le inauguration del sito vostre adjuta essera indispensabile. Primo il debe haber moderatores pro le varie subforos del sito. E pro vermente exploitar le possibilitates technic del systema, le collaboration de personas experte in PHP, SQL o con experientia general con le gerentia de sitos web, serea un grande avantage.

Dunque, si tu es interessate in adjutar con e/o le aspectos lingual e/o technic, o ha ulle ideas, suggestiones, questiones o commentarios in general, per favor responde hic - o al adresse lars.rosenmeier (coclea) gmail.com.

In fin io pote narrar que io ha jam comprate le nomine dominio (domain name) pro le sito, ma io non vole publicar lo ante que illo es usabile. Dunque si tu es un de illes al quales io jam ha revelate le adresse, per favor non ancora mentiona lo in public. :-)

Amicalmente,
Lars

--
http://falcatorrosa2.blogspot.com
*
Ask not what you can do for your conlang - ask what your conlang can do for you

Traductores anglese-interlingua besoniate/necessitate

2009-05-06T11:37:00.002+02:00

Io es facente un version in interlingua del software de foros Phpbb. Ma il ha tante texto a traducer que io pensa que il me durara plure annos!

Dunque si ulle lectores voleva adjutar, il serea multo benvenite. Contacta me per e-mail o scribe un commento hic.

Nove chat de interlingua de IALA

2009-04-09T17:53:00.006+02:00

Io ha ora create un nove chat de Skype specificamente pro parlatores de interlingua de IALA (e le parlator de romanica). :-)

Le chat non es affiliate con ulle organisationes o fractiones de interlingua.

Per favor, corrige solmente errores de alteres post lor invitation explicite.

Pro entrar le chat, on debe haber le programma Skype e clicca hic.

NB! Il pare que usatores del version le plus nove de Skype (v. 4...), non pote entrar in chats public via ligamines. Dunque ille usatores debe esser addite al chat per un del participantes jam in le chat. Dunque, si tu usa Skype v. 4... e vole participar in le chat, contacta me in Skype, ubi mi nomine de usator es "larsrosenmeier".

Nove chat auxlingual

2009-04-05T02:06:00.003+02:00

Proque le atmosphera pote a vices parer un poco troppo "ursin" in le chat de interlingua in Skype, io ha ora create un canal alternative.

Como le altere chat, il es permittite scriber é in linguas auxiliar, é linguas "natural".

Pro adjunger se al chat, on debe haber le programma gratuite Skype e cliccar hic!

In caso de problemas con entrar le chat, contacta me in Skype (larsrosenmeier).

Til balde, amicos! - le chat de Skype deveni inter-auxlingual

2009-04-01T16:49:00.003+02:00

In le plus que tres menses que io ha essite ligate a un chaise rolante, io ha passate mesmo plus tempore al computator que io soleva. Inter altere cosas io ha participate multo in le duo chats public de interlingua que existe in le rete. Le un es de chat de IRC, que io mentionava in le ultime articulo (#interlingua in le servitor Freenode - anque accessibile de www.interlingua.com/chat; moderate per Péter Kovács. Le chances de trovar co-chattantes es le melior le mercuridi e sabbato vespere).

Le altere es le chat de Skype, create per Josu Lavin - lege plus hic super como entrar lo. Ben que le lingua normalmente usate in le chat es interlingua de IALA, il es permittite scriber tamben in tote altere linguas existente. Le chat es dunque un bon loco pro interlinguistas qui vole haber lor horizontes allargate un poco. Inter le chattantes regular un trova assi Claudio Marcon, le sol remanente usator del lingua auxiliar Romanica - un lingua cuje vocabulario es identic con le de interlingua, ma con un grammatica plus natural/romanic.

Recentemente alicun idistas ha comenciate usar le chat tamben. In general le communication inter le interlinguistas/romanichista e le idistas ha passate sin grande problemas e ambe gruppos ha gaudite que illes pote comprender le altere lingua sin haber studiate lo.

Compare hic le vocabularios del duo linguas - como on vide, illos es quasi identic, e le differentia es plus tosto debite al grammatica - le de ido es multo structurate con multe affixos productive.

Anque alicun esperantistos visita a vices le chat, e anque le communication con illes ha essite sin major problemas, ben que le vocabulario de esperanto es plus distante de interlingua que le de ido.

In mi opinion il es multo positive vider iste parve passos verso 'fraternalisation' del varie linguas auxiliar, cuje adherentes a vices monstra tendentias a sectarismo e intolerantia del altere linguas. Un situation que es tanto plus deplorabile proque multe del linguas auxiliar es basate al mesme vocabulario international e es a un multo alte grado mutualmente intelligibile. (Como Alexander Gode mesme scribeva, linguas como interlingua de IALA, interlingua de Peano, interlingue, ido, etc. es vermente dialectos del mesme lingua.)

Esque un esperantista pote apprender interlingua in tres dies?

2009-03-24T21:00:00.007+01:00

[Edit: Vide le update in basso]

Le responsa forsan va esser date le jovedi veniente.

Le “prehistoria” es isto: Durante le chat de interlingua in IRC le sabbato le 21 de martio le usator “Xxx” era relegate del canal de interlingua (#interlingua) proque ille parlava esperanto in illo. (Como ille habeva facite anque antea malgrado le petitiones de altere usatores.)

Ille era permittite retro in le chat post poc minutas, post haber promittite non plus parlar esperanto ibi. Ma totevia ille era multo infuriate per le affaire, e un grande discussion sequeva in le canal de esperanto (##esperanto) durante le qual Xxx inter altere cuneava cinque nove theses de interlingua non multo flattante.

Post alicun horas de discussion “Xxx” decideva que ille apprenderea interlingua in tres dies, assi que on poterea vider que ille poterea facer lo, post le qual ille lo oblidarea de novo! Lo que isto serea in effecto un grande reclamo pro interlingua non le preoccupava.

Si on vole vider si “Xxx” pote complir su intention, on debe venir al canal #interlingua al servitor de IRC de Freenode. "Xxx" desirava solmente comenciar de apprender interlingua le dominica e dunque promitteva que ille parlarea interlingua fluentemente le jovedi veniente!

Si on non ha un programma de IRC on pote adjunger se al canal per le adresse www.interlingua.com/chat .

(Scribite con le consentimento apriori de "Xxx", cuje supernomine real essera revelate pendente su consentimento final.)

Update (le 25 de martio)

"Xxx" ha hodie informate, que ille debe lassar su urbe alicun dies pro solver un problema familial, e que ille dunque non va poter complir su intention.

Ancora, nos (le grande redaction de Falcatorrosa2) pote forsan dar un responsa al question ponite in le topico: In le chat de interlingua e alterubi nos ha plure vices incontrate personas qui poteva communicar practicamente sin errores post haber studiate interlingua solmente poc dies. Le plus rapide (YYYYYY)(!) chattava in interlingua jam le prime die que ille lo discoperiva, sin ulle errores notabile.

(YYYYY) era justo esperantista!

Radio Interlingua revivificate

2008-08-23T03:08:00.003+02:00

Hodie Radio Interlingua ha essite officialmente relanceate. Le 'revivificator' es le antementionate Sr. Kovács, qui ha laborate multo diligentemente con le projecto desde longe.

Lege plus, e audi le prime emission a su blog.

Péter anque ha facite un interview con me, ma il pare que illo non ancora es toto publicabile (il es possibile que io poterea haber essite melio preparate!). Alora vos debe esser patiente, si vos desira audir mi gemmas de sagessa. ;)

Le incontro nordic 2008

2008-08-22T01:34:00.006+02:00

Le incontro nordic habeva loco desde quasi un mense, e post mi retorno a casa io ha sovente volite publicar alcun photos e videos de illo, ma mi pigressa ha vincite cata vice. Ma ora Péter Kovács me ha inspirate a comenciar per postar alcun photos a su blog del viage a casa post le incontro.

Io incontrava ille e mi compatriota Klavs Neerbek al station ferroviari de Linköping, ubi illes habeva attendite lor trainos durante plure horas.

Post haber prendite un photo de Klavs e me, Péter comenciava photographar trainos (e Klavs e io debeva admitter que illos era un motivo plus belle que nos).

Io va postar plus photos plus tarde, ma si vos non pote attender (improbabile) vos pote trovar alcun in le web con un poco de astutia).

Le prime entrata blog

2008-07-15T03:59:00.003+02:00

Forsan un poco tarde post duo annos e quatro menses, ma ci io vos da mi prime ver entrata "blog" - como vos sape, blog significa vermente un diario electronic.

Io ha essite malade ora desde tres septimanas con alcun infection de gorga. Le prime duo septimanas illo se manifestava solmente como dolores (e un abundantia de muco) de gorga, ma in le ultime circa cinque dies illo ha essite como un ver rheuma/frigido/grippe/flue ubi le dolores (e le muco!) se ha trovate anque in le naso! Io debe haber consumite un parve foreste per sufflar lo durante le ultime dies.

Il non habeva ulle bacterias a trovar quando io visitava le medico post cinque dies de maladia. Deman io va al medico (re un altere cosa) e vole anque consultar les del maladia de novo.

Notas linguistic: 1) Io pensa que multe gente non cognosce le differentia inter un rheuma/cold/forkølelse/Erkältung e un grippe/flue/influenza - le ultime porta con se febre e sole durar solmente alcun dies, ma le prime tende a durar plus longe tempore. Totevia si on dice que on ha le rheuma nemo prende uno seriose, ma pensa que un es un "cauda debile" si on remane a casa. ("Cauda debile": interlinguification del magnific parola danese/germano "slapsvans"/"Schlappschwanz").

2) Io non del toto me senti convincite que le parola del IED "frigido" pro "cold" es un reflexion correcte del nomine del maladia "cold" in le linguas fonte - dunque io anque sole scriber sempre "rheuma". Con "frigido" Sr. Gode e su collegas ha forsan plus tosto pensate al sensation de frigor, e non al maladia viral.

"Sur un nota differente" io ha cambiate le subtitulo del blog a "Interlingua - proque nos ama linguas!". Isto es pro me le sol causa realistic pro occupar se con interlingua (o ulle altere lingua construite/auxiliar). Le mundo non pote jammais essser salvate per un lingua, ma si illo pote dar alcun gaudio a su parlatores, illo ya anque non ha vivite in van (pro si dicer).

Crampa de papiros irritante

2008-07-09T16:18:00.013+02:00

Post haber laborate con MSWord (e haber essite molestate per su assistente - le crampa de papiro), io googlava >>annoying paper clip<<.

Del 1.230 resultatos, le prime esseva isto:

Esbjörn Svensson morite

2008-06-16T02:31:00.003+02:00

Le svedese pianista jazz Esbjörn Svensson moriva sabbato le 14 de junio 2008 in un accidente de immersion scuba a Ingarö apud Stockholm. Ille lassa un sposa e duo infantes.

Esbjörn Svensson obteneva fama international in circulos de jazz como gerente de Esbjörn Svensson Trio (E.S.T.), fundate 1990. Illes sonava un stilo de jazz moderne e innovative, sovente imprestante de altere generes, que appellava inter altere a multe juvenes.

Ci E.S.T. sona “Dodge the Dodo” del album “From Gagarin's Point of View” de 1999.

Quiesce in pace.

Stato post venerdi le 13

2008-06-14T01:34:00.007+02:00

Esque le venerdi le 13 justo passate ha essite tanto infortunate como on poteva timer? Que nos percurre alcun eventos que ha habite loco:

Nederland ha vincite Francia con 4-1 in le Cuppa Europee de football.

Microsoft Zune ha essite lanceate in Canada.

Le sud de Norvegia ancora es tormentate per incendios forestal, ma secundo mi comprension del pressa nulle humanos ha perite in illos, e le bulletin meteorologic promitte pluvia.

Centos de prisioneros militante ha essite liberate per soldatos de Tlaiban; in China 34 minatores es confinate in un mina, e in Russia 60 personas ha essite vulnerate in un accidente ferroviari.

Finalmente, in Irlanda le population disobediente ha habite le audacia de refusar le tractato de Lisbona, que politicos in tote altere paises del UE ha o habera ratificate sin informar lor populationes de que involve le tractato o mesmo demandar les que illes pensa de illo.

Un die infortunate o non? Que dice le jury? :-)

Re bombas e condemnationes

2008-06-04T16:13:00.002+02:00

On dice que on pote judicar quanto sincer es un apologia, per notar si illo es succedite per un “ma”. Pro exemplo, un apologia como “Io regretta que io furava tu auto, ma il era anque tu proprie falta, proque tu lassava le clave in le ignition” non pare multo sincer, e a pena pote esser acceptate como un ver expression de repententia.

Le mesme regula es usabile pro judicar declarationes de condemnation de atrocitates, como le bombar del ambassada danese in Islamabad anteheri.

Como anque antea, post le homicidio del inscenator nederlandese T. van Gogh, e le planos de assassinar le designator K. Westergaard, on pote vider que multe condemnationes es in effecto succedite per un “ma”.

Pro exemplo ha un association jordanian, “Le currero nos uni”, publicate un declaration condemnante le “uso categoric de violentia in responsa de attaccos systematic a Islam e le propheta” “Ma le autoritates danese debe assumer le major parte del responsabilitate de lor fallimento de introducer regulationes discoragiante contra le medios danese, que provoca le sentimentos musulman.

Un editorial in le jornal Khaleej Times del Emirates Unite, anque condemna le bomba, “que ha nihil a facer con islam”. “Ma al mesme tempore il es un communication a paises como Danmark, que il es mal e directemente periculose attaccar le fide de alteres in le nomine del libertate”.

Le jornal pakistani “The Post” anque condemna le attentato, ma adde que “le Occidente debe comprender que le libertate de expression non permitte violar le sentimentos de milliones de personas. (Fonte: eb.dk.)

Al altere latere, anque condemnationes sin reservationes ha essite publicate, pro exemplo per le capite religiose influential al-Qaaradawi, un del originatores del protestos in 2006.

Anque le Societate Religiose Musulman danese scribe in lor sito web, que il es totalmente inacceptabile, e justificabile per nihil, que le ambassada esseva attaccate.

Octo personas esseva occidite in le attacco, que probabilemente esseva causate per furia del designos de Muhammed, particularmente illo depingente ille con un bomba in le turban.

Quiz de citationes de films

2008-05-26T20:59:00.002+02:00

Inspirate per le citationes de films in Panorama per Richard Sorfleet, hic es un parve quiz pro vos. Tote enunciationes dicite in le lingua del film ha essite traducite a interlingua. Si on pote divinar tote octo films, on gania ... ben nihil, infortunatemente (ultra le honor).

Quante pote vos divinar? Per favor, scribe vostre conjecturas in un commentario.

Ecce le citationes:

1. "No, IO es tu patre.

2. "Forsan il ha crema anti-rugas, ma il non ha crema "anti-bastardo-grasse"

3. "Io es un chauffeur excellente."

4. "Not yet, cameradas, not yet!"

5. " - Si mercede es demandate ...
- Nulle mercede va esser demandate.
- O date."

6. " - Tote vos es individual
- SI, TOTE NOS ES INDIVIDUAL"

7. "Io non plus pote esser inactive e permitter infiltration communista, introduction communista, subversion communista, e le conspiration international communista pro exhaurir nostre preciose fluidos corporal."

8. "Quando io esseva institutionalisate, mi cerebro esseva studiate comprehensivemente per le typos del 'sanitate mental'. Io esseva interrogate, io esseva radiographate, io esseva examinate profundemente. Alora, illes prendeva toto concernente me e lo poneva a in un computator ubi illes creava iste modello de mi mente. Si! Usante ille modello illes succedeva generar tote pensata que io poterea possibilemente pensar in le proxime, ben, 10 annos."

Le monarchia danese

2008-05-24T20:28:00.011+02:00

Durante que le major stationes televisive danese reporta del nuptias de prince Joachim e Marie Cavallier tote le die, io vos presenta alcun informationes del monarchia danese, e alcun reflexiones super su ration de esser.

Le rege danese Frederik le Septime (1808-1863) esseva un homine tranquille e demotic, alora al 21 de martio 1848, quando un demonstration con 15.000 homines, guidate per le politico Orla Lehman, presentava al rege un adresse demandante democratia, ille lo simplemente acceptava.

Dunque le democratia danese nasceva sin que un sol unda de sanguine esseva effundite, e al 5 de junio le proxime anno Danmark habeva su prime constitution democratic - le “Grundlov”.

Il esseva un decision sage per rege Frederik, qui non solmente evitava esser decapitate, como es le costume durante revolutiones, ma anque reteneva un poc de potentia (Danmark esseva solmente completemente democratic in 1901.)

Alora il es gratias al sagessa de Frederik, que Danmark ancora es un monarchia post 160 annos. In nostre era illuminate, stante al summitate de saper e scientia, IT, e technologia genetic, nos ancora ha un familia regal, qui porta coronas, vive in castellos, e transversa le urbes in carrossas auree a occasiones festive. E illo es plus popular que jammais antea.

Nostre regina currente, Margrethe, nos ha guidate desde 1972. Su familia consiste de su sposo prince consorte Henrik (anteriormente conte Henri de Monpezat de Francia) e lor infantes prince hereditar Frederik, e prince Joachim. Joachim es, qui hodie se marita (pro le secunde vice) con le francese Marie Cavallier.

Le familia regal es amate per le (majoritate del) populo, particularmente le regina e le prince hereditar. Le prince consorte al altere latere pare esser un poco minus popular, forsan inter altere proque ille post quaranta annos in Danmark non ancora pote parlar danese solmente partialmente correcte, e proque ille ha declarate que ille soleva castigar su filios “como cavallos e canes”. Ma assi es ya le circumstantias - le familia regal sta super le lege, e on non pote expectar que illes omitte batter su infantes, como es requirite per le lege le resta del population.

Ultra esser un fumator ardente, nostre regina non es le figura jovial e demotic, como esseva p.ex. su patre Frederik le None, le rege marinero qui esseva cognoscite pro su multe tatus. Per contrasto, illa e su familia pare ambir se exclusivemente con personas aristocratic o multo ric, e solmente incontra le populaceo durante le visitas official in varie urbes, que illa debe facer alcun vices cata anno.

Similemente, quando le regina recipe visitantes pro le “Nytårskur” (le celebrationes del nove anno), il es clar que solmente personas ric o distinguite pote esser invitate, justo como solmente tal personas pote esser considerate pro esser innobilite. Le regina ha explicate in intervistas, que isto non es antidemocratic, nam tote personas in nostre societate ha *possibilitates* equal de devenir ric o distinguite.

Ben que il forsan non es multo cortese a iste die festive, on poterea ya demandar se, perque nos ancora hodie debe haber iste institution antiquate que es le monarchia, e si nos es adequatemente reimbursate pro le multe milliones de coronas que nos cata anno paga al sustenentia luxuose de iste poc personas.

Un argumento que on sempre audi demandante iste question, es que le monarchia ha un influentia positive al economia danese - e il es anque ver que membros del familia sovente participa in ferias mercantil e altere eventos ubi illes pote beneficiar le exportation de grande interprisas. Ma in iste dies ubi placias de labor de plus in plus es movite (“outsourced”) al extero, on pote ya demandar se si le reclamo regal vermente beneficia le populo integre, o solmente le actioneros del interprisas.

Un gruppo que vermente es beneficiate per le monarchia es le pressa “colorate”, que sempre ha bon historias a imprimer re le familia regal. P.ex. il ha le cartel de pressa gigante “Aller Press A/S”, que inter multe altere magazines possede “Billed-Bladet” - que consiste quasi solmente de historias elogiose del familia, e “Se & Hør” que ha como su specialitate imprimer historias irreverente de illo.

Finalmente nos naturalmente non debe oblidar le multissime personas qui se gaude per admirar le familia regal. Como actores e cantatores, illes da un poco de brillantia e fabula al vita enoiose de multes.

Si on non pertine a un del tres gruppos mentionate, il pote esser difficile vider le utilitate del monarchia.

In mi opinion le solution es simple. Illes que le monarchia beneficia pote anque mesme pagar pro illo. In Danmark, tote membros del ecclesia popular (statal) debe pagar taxas ecclesiastic. Ma si on se retira del ecclesia on es exemptate del taxas.

Proque non facer le mesme con le monarchia? Totes qui ha (o crede haber) ulle beneficio del monarchia, pote esser “membros del monarchia” e pagar “taxas monarchista”.

E illes qui non vide le utilitate del monarchia, o qui forsan mesmo lo considera un institution antiquate e ridicule, poterea retirar se de illo.

Le monarchia certo superviverea un tal arrangiamento, viste que illo es tanto popular.

Un tal systema es naturalmente politicamente inimaginabile hodie. Ma in le proxime 50 annos le composition ethnic de Danmark se cambiara sin dubita profundemente. Il sera interessante vider que occurre con le monarchia in iste periodo transitori.

Le addition le plus recente al familia regal

Johannes le phoca

2008-05-08T23:22:00.012+02:00

- conto humosophic per Bjarne Hosbo

(Imprimite con le permission del autor.)

Il habeva olim un phoca mysteriose. Illo similava plus a un homine que a un phoca. Illo poteva anque parlar e portar habito e facer su compras al Magazin du Nord. Ma tamen illo esseva un phoca.

Illo similava a un homine sur le exterior – e habeva anque un nomine completemente ordinari: Johannes Jokumsen-Jørlunde. Le problema esseva: Geneticamente Jokumsen esseva un phoca. Dunque ille non poteva haber infantes con su sposa.

Sed ille poterea facilemente copular con un phoca feminin. Tamen ille non faceva isto, nam ille non sapeva que ille esseva un phoca.

Su parentes habeva essite ordinate non contar isto a ille. Pois alora le infante poterea haber complexos – e possibilemente sensationes infortunate, quando ille esseva in le jardin zoologic.

Tamen le sposa Jonna Jokumsen parturiva non minus que tres infantes san e brave – que in nulle maniera resimilava un phoca.

Como poteva illo occurrer?

Proque seniora Jokumsen esseva un dama multo social, qui con placer participava in omne le gaitates de su loco de labor, Joco & Nonsenso, in Loco del Riso - como prandios de Natal, jubileos, picnics, etc. E tal cosas pote haber resultatos multo fertile.

Un die in le calide estate de 1992 le familia esseva foras pro baniar se in le Golfo del Lamento. Johannes amava natar, e se moveva poco a poco plus e plus longe ab le plagia. Subito ille esseva absente. Le sposa e le infantes essayava reguardar le. Sed illes videva solmente duo phocas, qui se moveva in le undas in un joco de copular vivace.

Nove sitos in interlingua

2008-05-08T07:28:00.003+02:00

Hic es alcun nove sitos de interlingua, que non mesmo Martein Sveinsson pare haber discoperite. ;)

Le sito de Lingox - de Finlandia - un senior con su proprie opiniones le quales ille non time divulgar. :P Le sito contine inter altere cosas un blog.

Le blog de Cryp - de Italia. Primarimente in italiano, ma con plure entratas in interlingua, o con summarios in interlingua.

Jam ha essite publicate alterubi le blog personal de

Daniel H. - de Anglaterra,

e le canal de Youtube de Hyperlingua - con un version in audio del Curso de Conversation per Harleigh Kyson Jr., narrate per un robot. Le autor del canal anque ha un sito re interlingua in germano, con un curso.

Le 350te anniversario del Pace de Roskilde

2008-02-26T06:58:00.000+01:00

Hodie (martedi) ante 350 annos esseva concludite le Pace de Roskilde, in le qual Danmark-Norvegia debeva ceder a Svedia le regiones de Scania, Halland, Blekinge, e Bornholm (de Danmark) e le feudos de Bohus e Trondheim (de Norvegia).

Trondheim e Bornholm rebellava e poteva plus tarde retornar a lor patrias. Ma le resto del regiones ha essite parte de Svedia usque hodie.

Danmark perdeva a iste occasion un tertio de su territorio.

In le annos sequente le autoritates svedese conduceva un stricte policia de “svedification” in le regiones conquirite, ma totevia il ancora pare que multe habitantes del vetule regiones danese senti un vinculo con Danmark.

Io invia hodie un pensata amical a Scania, Halland, e Blekinge, super toto naturalmente al multe interlinguistas qui habita ibi. :-)

Un update

2008-02-26T02:23:00.000+01:00

Hic es un update del duo ultime articulos in caso que alcuno serea interessate:

“Tumultos pro le sexte die e un nove crise de designos?”

Le demonstrationes ha continuate in multe paises in Africa, Asia, e le Medie Oriente. Hodie le bandiera danese esseva incendite in Pakistan, e, secundo le bureau de Ritzau, Sudan officialmente declarava un boycott de omne productos danese. Ma fortunatemente on non ha vidite le violentia que se usava ante duo annos, e nulle ambassadas ha essite attaccate physicamente.

Le tumultos in urbes danese se ha diminuite. Hodie le medias danese solmente reportava de poc incendios.

Un gruppo de juvenes de Nørrebro, ubi le tumultos comenciava, dava ante un septimana un declaration ubi illes explicava lor motivation. Inter altere illo describe le policia local como racialistic, brutal, e violante le derectos del juvenes, super toto in connexion con le perquisitiones frequente. Anque le policia es dicite haber essite violente contra un vetule immigrante, lo que les infuriava de plus. Le policia nega le assertiones del declaration.

“Le prime bomba?”

Responsa: No, il solmente esseva septe litros de gasolina. (Es bon que io memorava le signo de interrogation.) ;-)

Le policia ha scrutiniate le registrationes del camera de securitate in le solario. Hic il se vide como le duo juvenes vade calmemente trans le solario dispersante septe litros de gasolina. Il pare que il esseva le fumos del gasolina que causava le explosion.

Multe imagines del perpetratores ha essite publicate pro identificar les, ma le resultatos ha usque hodie essite poc. Dunque le policia habeva un tempore le theoria que le perpetratores habeva venite de un altere pais, probabilemente Svedia. (Forsan le incendio esseva lor maniera de celebrar le 350te anniversario del Pace de Roskilde.) ;-)

Ma secundo un policiero in le programma de television “Station 2” iste vespere, le theoria ha ora essite abandonate, e il pare que le policia ha alcun tracias del identitate del duo homines.

Le prime bomba?

2008-02-22T02:05:00.000+01:00

Durante que le numero de incendios ha essite diminuente al ultime dies, heri, al 20 de februario, un solario in Østerbro in Copenhagen explodeva. Miraculosemente nemo esseva ferite - duo stanneros habeva justo descendite a in le cloaca juste presso al solario, quando le explosion occurreva.

45 minutas ante le explosion duo artisanos esseva pedite directiones al solario per duo homines de apparentia estranier in lor vinti annos. Post le explosion, le artisanos videva le duo juvenes curre del solario, jectante via un tasca al trottoir. Le tasca esseva plus tarde investigate per le policia. Illo contineva un latta de gasolina vacue e un malleo (ang.: sledgehammer).

Le theoria de policia es que le explosion esseva debite a un bomba de gasolina.

Le proprietario del solario assecura que ille ha nulle inimicos, alora le motivo del crimine eventual es un mysterio, e pro le medias danese e pro le policia. Ma le policia assecura, que isto non es un acto de terror, ma solmente un “drengestreg” (ang.: prank), un burla pueril. Le policia anque non opina que le explosion ha ulle connexiones con le tumultos e incendios que ha habite loco durante le ultime septimanas. Le policia non ha communicate como illes ha potite arrivar a iste conclusiones sin cognoscer le motivo del juvene suspectos.

Del resto, hodie duo altere solarios esseva incendite. Le prime in Brønshøj in Copenhagen in le matino. Le incendio esseva discoperite per un femina qui prendeva sol in le solario, e duo immigrantes de secundo generation ha postea essite arrestate. Le secunde in le postmeridie in le parve urbe provincial Stege, al insula Møn. Iste incendio esseva rapidemente extinguite e il ha nulle suspectos.

Ambe istos solmente esseva incendios normal, non explosive.

Le policia assecura que iste incendios ha nulle connexion con le explosion de heri, e non esseva actos de terror. Anque iste casos solmente esseva burlas pueril.

Alora il ha nulle causa pro alarma. ;-)

Tumultos pro le sexte die, e un nove crise de designos

2008-02-17T03:25:00.000+01:00

Un nove crise de designos se evolve in Danmark e iste dies.

Al 12 de martio, le policia de securitate danese arrestava tres homines pro haber planate assassinar le designator K. Westergaard, qui ante duo annos designava le propheta musulman con un bomba in le turban.

Isto faceva plure jornales danese (re-)imprimer le designos de Muhammed, originalmente publicate per le quotidian Jyllandsposten in 2006, que alora duceva a grande tumultos in le mundo musulman.

Ora il pare que le historia pote repeter se. Il ha jam habite protestos e demonstrationes in plure paises musulman, le bandiera danese ha essite accendite, e un consilio parlamentari danese ha debite cancellar un visita planate a Iran, proque le governamento iranian exigeva un excusa official del governamento danese pro acceptar le visitantes.

In plus, juvene immigrantes (e descendentes de immigrantes recente) ha durante le ultime sex dies create tumultos in plure urbes danese. Innumerabile autos e containers e plure edificios, inclusive scholas e un “pre-schola” (kindergarten), ha essite incendite.

Il non es clar que ha motivate le tumultos. Alcunos opina que illos es debite a furia del reimpression del designos. Alteres que le juvenes simplemente se enoia e vole haber attention.

Le prime tumultos (que occurreva in Copenhagen) pote esser connectite con le “zonas de perquisition” que ha recentemente essite establite in plure locos del citate, pro impedir attaccos con cultellos. Hic le policia pote facer perquisition de tote personas que illes suspecta porta cultellos, sin ulle probas firme, e iste forsan ha frustrate alcun del juvenes.

Pumperos extingue un del incendios in Copenhagen

Solsticio

2007-12-22T23:29:00.000+01:00

Vor sol er bleven kold,
Vi er i vintervold og dunkle dage.
Men nu er nedgang endt, og håbet tændt,
- ja, håbet tændt, for nu er solen vendt,
nu kommer lyset og den lange dag tilbage.

Johannes V. Jensen, 1921

Traduction directe (e multo mal):

"Nostre sol ha devenite frigide.
Nos es in le fortia del hiberno e dies obscur.
Ma ora declino ha cessate, e le spero accendite
- si, le spero accendite, nam ora le sol se ha tornate.
Ora retorna le lumine e le longe die. "

Felice solsticio.

Anniversario

2007-03-10T11:59:00.000+01:00

Hodie iste blog comple un anno.

Alcun statisticas:

In le blog ha usque ora essite postate 36 entratas, 104 commentarios, un video, un canto, e 63 photos, le quales ha monstrate i.a. circa 50 interlinguistas, cinque vaccas, un rana, alcun pisces animate, e le monstro de Loch Ness.

Le ecosystema le plus folle del mundo

2006-12-06T18:56:00.000+01:00

Nunquam oblida tener a vostre infante interior, p.ex. per ingagiar in jocos sin ulle scopo rational.

Pro iste objecto io recommenda le joco computatorial “Insaniquarium” per Popcap Games, que anque pote esser jocate in le sito de Yahoo.

In le joco on debe tener un aquario, nutrir le pisces e proteger los contra monstros extraterrestre. Fortunatemente le pisces excreta numismas e joieles, assi que on pote haber moneta pro comprar nove pisces, meliorar lor nutrimento, comprar armas pro tirar le monstros etc, etc.

Post 5-10 minutas se ha evolvite un ecosystema multo estranie - ma anque multo amusante.

Le pisces normal excreta numismas, le pisces aurate excreta stellas, que es mangiate per le “attrappatores de stellas”, que mesme excreta joieles. Le coclea e le medusa adjuta con colliger le moneta, stellas e joieles, dum le belle canto del sirena incoragia le pisces a producer plus monetas.

Pro jocar le version gratuite, clicca hic.

Magnatune – distributor non-maligne de musica

2006-11-21T16:06:00.000+01:00

Cercante de musica in le (ora tristemente decedite) Windowsmedia-search, io trovava le sito Magnatune - un distributor de musica que, como dice lor slogan, non es maligne.

Isto se monstra per le facto que omne artistas del interprisa obtene 50 per cento del invenito del vendita de lor musica. In plus le clientes selige mesmo quanto pagar – de 5 a 18 $ (4 -14 Euros). Finalmente omne obras pote esser audite gratuitemente in le sito in un qualitate multo alto. (E salvate como MP3s, si on pote trovar los in le mappa de “Temporary Internet Files”.)

Le sito ha musica in un grande rango de generes, includente un grande section de musica classic. Si alicuno es interessate in tal musica, le sito anque ha multe obras medieval. Audi p.ex. le belle canta anglese “Alysoun”.

Interlingua como ponte al linguas romance I: Interlingua e italianos

2006-11-12T19:26:00.001+01:00

In omne le reclamos pro interlingua il es asserite que le lingua pote esser usate pro communicar con parlatores de linguas romance. Io ha legite con interesse plure articulos in Panorama e alterubi, in le quales interlinguas narra que illes ha usate interlingua assi, ma recentemente io decideva mesme testar le assertion. Viste que io non ha ulle moneta pro viagiar, io decideva facer le secunde melior: Postar messages in interlingua a foros electronic in linguas romance.

Io voleva comenciar con italiano e trovava facilemente un gruppo de novas italian tractante del linguas: it.cultura.linguistica.italiano. Ibi io postava le message sequente (ultra alcun errores orthographic, que io ha corrigite in le sequente) :-) :

Car lectores de it.cultura.linguistica.italiano

Iste message es scribite in un lingua auxiliar appellate 'interlingua'. Io excusa si il es un violation del regulas (fundatio?) del gruppo scriber in interlingua (o altere linguas non-italiano) hic.

Le ration que io lo face, es que nos qui es parlatores de interlingua, sempre fanfarona que (inter altere) le italianos pote comprender interlingua sin studios previe. E io es curiose si isto es ver in practica. Dunque io serea grate si (alcuno de) vos voleva responder a mi message e lassar me saper quanto de illo vos pote comprender.

Anque, io ha audite que in partes de Italia on parla dialectos que es plus proxime a interlingua que le italiano 'standard'. (Forsan al nord?) Esque isto es ver, e in tal caso, que es le nomines de iste dialectos (o ubi esque on los parla)?

Gratias in avantia. :-)”

Le resultato esseva multo positive. Le prime responsa esseva (in anglese): “Un parlator de italiano pote comprender omne parola del texto in supra”.

Le secunde responsa esseva simplemente: “Isto es ver.” (Que le italianos pote comprender interlingua
sin studies previe.)

Le tertie (in anglese e interlingua): “Si, io lo comprende perfectemente”.

Etc., etc.

Le sol parolas, que on trovava estranie, esseva 'fundatio' (que ya non anque existe in interlingua), “gruppo de novas”, e “fanfaronar” – ben que illes poteva facilemente conjecturar le significantia del ultime parola del nomine italian “fanfaron”.

Un del lectores traduceva le message a in italiano pro demonstrar le similaritate e differentias inter le duo linguas:

"Questo messaggio e' scritto in una lingua ausiliare appellata (chiamata) IL. Io (mi) scuso se e' una violazione delle regole del gruppo scrivere in IL (o altre lingue non italiane) qui

La ragione che io lo faccio, e' che noi che siamo parlatori di IL, sempre vantiamo che (tra l'altro) gli italiani possano comprendere IL senza studio previo. E io sono curioso se questo e' vero in pratica. Dunque io sarei grato se alcuno di voi volesse rispondere al mio messaggio e lasciarmi sapere quanto di quello voi potete comprendere.

Anche, io ho udito che in parti d'Italia si parlano dialetti che sono piu' prossimi (vicini) all'IL che l'italiano standard (forse al nord ?). E' che questo e' vero, e in tal caso, quali sono i nomi di questi dialetti (o dove e' che li si parla)

Grazie in anticipo”

Naturalmente mi message esseva assatis simple, ma io anque scribeva altere messages al gruppo, e on semblava anque comprender illos sin ulle problemas.

Un del responsas le plus remarcabile, esseva le sequente (in anglese):

“Sia secur, un puero de dece annos poteva facilemente comprender tu messages. Quando io esseva un infante, io legeva contos de Donald Duck, e le personas parlava quasi assi”(!)

Ma ille elaborava que isto esseva solmente le caso quando le anates representava cavalleros e paisanos del medievo.

Tote le discussion pote esser legite hic: Esque vos pote comprender iste texto?

Alcun septimanas postea io dinava in un restaurante italian con servitores italian, e io prendeva le chance pro testar si italianos anque poteva comprender interlingua parlate.

Post un explication introductori, io diceva alcun phrases al servitor in interlingua, ma ille non pareva comprender ulle. Ille explicava, que ille esseva napolitano, e que il habeva grande differentias inter le lingua in partes differente de Italia, e pro isto ille non me comprendeva.

Io non voleva ceder tanto facilemente, alora plus tarde io ordinava un vitro de aqua de soda con le parolas (in interlingua):

“Da me un parve vitro de cola light, per favor. Solmente un medie vitro. Tu me comprende?”

“Si!”, ille respondeva post un pausa.

Un minuta plus tarde ille me apportava un multo grande e multo plen vitro de cola light.

Corrige mi errores, per favor

2006-11-06T15:30:00.000+01:00

Si vos trova ulle errores linguistic in mi textos, io serea multo grate si vos voleva corriger los. Vos pote facer lo per scriber un commentario al entrata in question. (Il non es necessari haber un conto de Blogger pro scriber commentarios a mi blog - simplemente selige "altere identitate" e scriber vostre nomine in le spatio "Nomine".)

Messenger

2006-11-06T15:24:00.000+01:00

Si alicuno es interessate in parlar con me in interlingua (in voce), illes pote contactar me a mi conto MSN. Le nomine del conto es: rosie313b (coclea) hotmail.com.

Sia advertite que io es in effecto un homine/viro, malgrado le nomine forsan un poco feminin "rosie". (Illo es un abbreviation de mi nomine de familia "Rosenmeier".)

Alora si vos vole "scorar" un "interlingua babe", vos debe cercar alterubi. ;)

Le copenhageses vinceva Manchester United

2006-11-02T03:06:00.000+01:00

Pro le beneficio del 2-3 interessatos de interlingua qui io sape es enthusiastas del equipa de football F.C. Copenhagen, lassa me congratular vos con vostre prime victoria (e anque le prime goal) in le liga del campiones. E mesmo super un del plus grande clubs del mundo.

A altere lectores possibile io pote narrar que le sol goal del match esseva toccate per Magnus Allbäck, un del multe svedeses in le "Superliga" (prime division) danese.

(Vide anque: FC Copenhagen faceva le impossibile – ora attende Man U.)

Parlar klingon non es un guasto de tempore

2006-10-25T04:05:00.000+02:00

Como multe de vos probabilemente sape, le serie televisori sci-fi “Star Trek” ha causate le nascentia de un lingua construite appellate “Klingon”, que pretende a esser parlate per enthusiastas de tote le mundo. (In le serie Star Trek, le racia 'klingon' es un racia de fer guerreros feroce, con grande frontes ossee.)

In 2005 appareva un film documentari per le director Alexandre Philippe appellate “Earthlings: Ugly Bags of Mostly Water“ (“Terranos – fede saccos de principalmente aqua”). In le film se monstra le enthusiastas de klingon durante un conferentia annual – le “qep'a'“.

In un interview in “Fortean Times” - le magazin pro phenomenos estranie – in septembre, le director defende le “klingonistas”, que ille concipe como multo intelligente in general.

Ille dice: “Le ver question es: Esque io guasta mi tempore facente films? [...] Esque enthusiastas de sport guasta lor tempore vidente football al television? Io pensa que no. Le terra es un placia estranie e nos mesme debe dar signification (“meaning”) a nostre vita. Si il es significative pro illes apprender klingon – proque il es amusante pro illes, proque il es un excellente exercitio mental, o proque illes vole trovar amicos assi - como pote nos dice que illes guasta lor tempore? Io desirea que gente serea plus introspective ante burlar se de trekkies (enthusiastas de Star Trek) o parlatores de klingon. Pro me il non es false facer alique de que on es passionate – specialmente si on non noce a o offende alicuno. [...] Considerante quante personas hodie es passionate de occider le unes le alteres, io pensa que nos non ha le derecto de criticar personas qui opta pro usar lor horas libere a studiar un lingua del spatio exterior.”

Que pensa vos del idea de haber facite un film documentari de nos interlinguistas? Il serea in omne caso un bon maniera de facer plus cognoscite le lingua. Qualcuno vole dar Alexandre Philippe un appello de telephono? :-)

Re veritate e correctitude politic

2006-10-10T21:02:00.000+02:00

Le policia ha heri trovate le perpetratores qui effundeva strychnina in le aqua, e illes ha confessate.

Illes esseva justo pueros, plus concretemente illes habeva 12, 12 e 15 annos. Le medias non ha reportate ulle de lor ethnicitate.

Io regretta que plure lectores ha probabilemente formate le opinion, basate a mi ultime entrata, que io es alcun racialista plen de prejudicios. Isto io naturalmente non mesme opina, ma io es (e esseva) attente, que le message infringeva le normas de correctitude politic que es valide in nostre parte del mundo.

Dunque io vole ben elaborar mi pensatas re le problemas que ha apparite a causa del immigration in Europa de personas de altere partes del mundo, assi que nemo pote esser in dubita de ubi io sta:

1. Si, io opina, que il esseva un judicamento rational, que le perpetratores esseva de origine musulman. Isto es un judicamento rational, proque:

2. Il ha vermente multe, multe musulmanes in Danmark, qui despice e le valores danese (europee), e le population, que illes opina es 'infideles'.

Iste detestation que multe musulmanes senti al daneses, es anque manifeste in le die quotidian pro multe daneses. Illes pote inter altere constatar lo per le multe incidentias ubi bandas de musulmanes attacca physicamente daneses infantil e vetule. Pro exemplo, in mi urbe natal, il non es recommendabile pro seniores sortir del casa post que le sol se ha ponite, proque le risco de esser attaccate es troppo grande. Isto non es alique que io inventa, infortunatemente.

3. Io non opina que on pote pardonar tal cosas con referentias a como le europeos/daneses es racialistas, o que illos es causate per problemas social, o que le problemas con le integration es "nostre falta". Io opina que il ha alcun elementos in le fide musulman e le cultura medie-oriental, que es le causa predominante del problemas. Isto on pote inter altere vider per le facto que il ha simile problemas in omne altere paises west-europee, e per le facto que le sol gruppo con que il ha problemas in omne le paises es le gruppo musulman. (Al contrario, il ha nunquam habite ulle problemas con p.ex. immigrantes chinese, vietnamese, etc.)

Ma:

4. Isto non significa que TOTE musulmanes in Danmark/Europa contemne le pais al qual illes ha immigrate. Il es evidente que il ha anque musulmanes qui respecta le valores e populationes europee, e qui mesmo se senti como daneses, svedeses, etc., e non como habitantes del paises del quales illes ha emigrate. Io vole sublinear que io ha absolutemente nihil mal a dicer de tal personas, qui respecta Danmark e essaya esser un parte constructive de illo, non importa de ubi illes veni, e que es lor carnation!

5. Ben que il ha anque isto gruppo de immigrantes laudabile, isto non significa que on non debe confrontar le facto que anque le altere gruppo existe, qui contemne le pais al qual illes ha immigrate. E il ha infortunatemente sovente un tendentia a facer justo isto, e in le medias, e alterubi.

Isto es un resultato infortunate del correctitude politic, que on ha in multe paises europee, que pote portar con se que on non pote judicar le problemas de immigration rationalmente e dunque nunquam pote solver los.

In plus, si on supprime le discussion libere de tal factos, il pote sovente resultar in un crescentia de gruppos dextra-radical. Isto on pote p.ex. vider in Svedia, ubi omne problemas de immigration ha sempre essite taboo, e ubi il, per consequente, ha grande gruppos de "skinheads". Al contrario, in Danmark, ubi tal problemas ha essite un parte del debatto politic durante longe, il ha quasi nulle tal gruppos dextra-radical.

Strychnina in le reservas de aqua

2006-10-06T22:33:00.000+02:00

Heri (jovedi) il esseva discoperite que perpetratores incognite habeva irrumpite un puteo del installation de aqua in mi urbe natal, Greve, e habeva effundite toxico pro rattos, continente strychnina, in le aqua. Le puteo es situate poc cento metros de mi casa.

Le burgomaestro del citate diceva heri in un interview que le crimine esseva exequite con un alte grado de professionalismo. Totevia, hodie le chef del policia local ha dicite que ille non opinava que il esseva un acto de “terror”, ma un acto burlesc facite per pueros.

Ma que es “terror”? Si on effunde strychnina in le reservas de aqua public, on debe ya facer lo o pro occider le publicitate o pro terrer lo. Dunque il es per definition un acto terroristic, anque si le perpetratores non es major.

Io judica que le plus probabile es que le perpetratores es justo juvene pueros inter dece e vinti annos, de origine musulman, que ha volite colpar le societate infidel que illes ha apprendite a odiar tanto. Alcun del mesme juvene criminales qui desde plure annos ha facite le urbe insecur per viagiar in bandas e attaccar e molestar infantes e vetules. Illes non ha volite esser martyres (io non suppone que illes ha mesme bibite del aqua), ma le acto ha probabilemente date les un alte “street cred” inter lor pares.

Interessantemente, le acto non pare esser mentionate in un sol jornal international in anglese. Al contrario il ha multe mentiones de como le division pro juvenes del partito “Dansk Folkeparti” (“Partito public danese”) se ha divertite con designar nove designos de Muhammed durante un incontro. Isto esseva revelate per un “artista” qui ha essite “under cover” in le partito e registrate le divertimento con microphono celate.

Lo que es vermente espaventante es que multe personas, anque daneses, qui vole esser politicamente correcte, es sin dubita plus irate del actos del juvenes de “Dansk Folkeparti” que del actos del juvenes que effundeva toxico pro rattos in le reservas de aqua.

(Vide anque: Re veritate e correctitude politic.)

Le die europee del linguas

2006-09-28T04:11:00.000+02:00

Heri (le 26 de septembre) esseva le “die europee del linguas”. Iste dato esseva seligite in 2001 per le Consilio de Europa e le UE como le die annual pro “facer attender le publicitate del importantia de apprender linguas e diversificar le rango de linguas apprendite pro augmentar plurilingualismo e comprension intercultural; promover le ric diversitate linguistic e cultural del Europa; e incoragiar gente a apprender linguas in e foras del schola.”

Le die pare haber essite ignorate per le medias danese. Ha ulle de vos audite de illo?

Le sito official del die es a trovar in le sito del Centro Europee pro le Linguas Moderne sub le Consilio de Europa.

Le sito ha versiones in – anglese e francese. :-)

Esperanto como le lingua del UE?

2006-09-27T06:44:00.001+02:00

Sur le blog spot-on.com, le italiano Nicole Martinelli mentiona le possibilitate de usar esperanto como lingua official del UE. Illa ha dubitas si isto serea un bon solution, e io naturalmente divide su dubitas. :-)

Ma – lo que forsan va surprender plus le lector – io anque ha dubitas que interlingua serea un bon e realistic solution.

A un momento plus tarde, io va forsan scriber qualcosa plus re mi dubitas.

Intertanto, hic es partes de lo que scribeva Nicole Martinelli, sequite per partes del responsa que io ha inviate a illa (in interlingua). Io non sape ancora si illa pote comprender lo, ma io va reportar plus si illa me responde. :-)

Nicole Martinelli:

“English, the default lingua franca, costs the EU government €17 billion (about $22 billion) a year. That's a lot of money lost in translation, to be sure. These costs could be cut out entirely, the study says, if there were a common European language. (Italians, for one, have a notoriously hard time communicating in English).

I want to support Esperanto, I really do. [...] But how much time and money would it take to train everyone involved in the EU to communicate fluently in Esperanto? And how would you overcome the resistance to learn another language that could only be used for work? The bickering over official languages, with Globish as a common language, will no doubt continue”

Io:

“Le idea de usar un lingua construite pro communication in le UE non solmente es proponite per esperantistas. Essente un parlator de "interlingua" - un lingua 'neo-latino' construite in le medio del vintesime seculo, io audi sovente gente qui dice que interlingua es le optime solution del problemas lingual europee. Personalmente io pensa que le problemas de introducer un tal lingua in le UE serea tanto grande que il non valerea le pena, e io mesmo probabilemente prefererea un variante de 'globish'.

Ma, nonobstante, si on deberea seliger un del existente linguas construite pro le UE, interlingua certo serea le melior alternative. Interlingua es basate sur le linguas natural de Europa e dunque multe europeos, particularmente del sud de Europa, pote apprender lo assatis facilemente. Non pensa tu, pro exemplo, que le italianos lo trovarea multo plus facile que e anglese e esperanto? :-)

Il anque ha altere linguas neo-latino, ma interlingua es le major sin comparation. (Ma io non sape bastante del alteres pro saper si interlingua anque es le melior.) :-)”

Vaccas, vaccas, vaccas ...

2006-09-16T21:48:00.000+02:00

A proposito de vaccas hic es alcun plus photos prendite per mi matre, qui es un grande amator de vaccas:

“Nora” de “Brogaarden” - un ferma pro infantes. Illa non pare haber ulle ubere, ma mi matre assere totevia, que il es un vacca.

On non debe oblidar facer su exercitios gymnastic.

Chassante le cauda ...

Nora es infortunatemente le sol vacca al ferma, ma mi matre reporta que illa pare esser contente con le compania del cavallos e oves.

Alcun classic vaccas danese, del typo “multicolor rubie”.

Iste individuo besonia urgentemente un perruchero.

Despecto del manco grave que illo non es un vacca, iste cavallo anque ha trovate gratia del camera.

Vaccas parla dialectos differente

2006-09-16T20:15:00.000+02:00

Il ha longemente esser cognoscite que aves usa dialectos differente, dependente de ubi illos vive. Recentemente un gruppo de fermeros anglese pare haber discoperite que le mesme es le caso con vaccas.

Lloyd Green, representante del gruppo West Country Farmhouse Cheesemakers, ha dicite a Reuters que su vaccas certo mugi con un accento de Somerset. Plus concretemente le vaccas in le region mugi con un sono de “moo-arr” in loco del plus normal “moo”, que se usa plus al nord.

Le gruppo ha audite registrationes de vaccas de altere regiones e ha notate simile variationes in le moos de vaccas de Midlands, Essex, Norfolk e Lancashire.

Le fermeros credeva primo que le dialectos esseva causate per como parlava le possessores del vaccas, ma secundo linguistas que illes ha consultate, il es plus tosto un developpamento 'natural', causate per como mugi le altere vaccas in le grege, super toto le parentes.

Le nova esseva reportate per Reuters ante alcun septimanas. Pro plus informationes, vide p.ex. Orlando Sentinel (in anglese).

Discos dur potera prevenir tsunamis

2006-09-09T20:29:00.000+02:00

Le austriac Michael Stadler es creante un programma computatorial que debera prevenir tsunamis per registrar vibrationes in normal discos dur. Lege plus hic in un message per Giovanni Nappi al lista Interlng.

Anti-Slapping – un melior alternativa a Happy Slapping

2006-09-07T19:23:00.000+02:00

Un del prime entratas de iste blog (scribite al mesme die quando io lo creava) tractava del phenomeno “Happy Slapping” - le practica de attaccar personas innocente physicamente e filmar le attacco.

Ante pauc dies io apprendeva que un sito francese habeva ligate a iste entrata. Il se tractava del sito Anti-Slapping, cuje proprietario es le artista Rosario Caltabiano qui essaya fundar un movimento de “Anti Slapping” como alternativa a Happy Slapping. Le differentia inter Happy Slapping e Anti-Slapping es que un attacco de Anti-Slapping non es violente o aggressive, ma “dulce, amabile, attente: offerer un flor, dar un caressa o un basio, stringe le mano, etc.”, como le sito explica.

Le sito offere versiones in francese, anglese, italiano, e portugese e contine plure videos de “attaccos” de Anti-Slapping, e pamphletos que on pote imprimer e dar a su “victimas”.

Personalmente io va probabilemente nunquam ha le inclination (o corage) de exequer un attacco de Anti-Slapping, ma si on debe seliger illo certo es un melior alternativa que Happy Slapping. Il serea bon si Anti-Slapping esseva plus cognoscite inter juvenes (qui ya es le perpetratores normal de Happy Slapping.) Ma le sito (e le artista) es solmente mentionate in multo pauc sitos del internet.

Que vos pensa de isto?

Le terror se approcha a Danmark

2006-09-06T01:34:00.000+02:00

Hodie (martedi) un gruppo de novem personas esseva arrestate in Odense pro planar terror.

Le servicio secrete del policia (PET) habeva surveliate le gruppo durante longe tempore. PET dice que membros del gruppo habeva acquirite explosivos, e viste que PET non sapeva exactemente quando le gruppo intendeva exequer le action terroristic, on decideva facer le arrestationes ora.

Septe del novem arrestantes ha essite imprisionate, sex del quales es citatanos danese. Un de istos es un danese ethnic (probabilemente un converso musulman).

Le arrestation habeva loco in Vollsmose, un suburbio de Odense in Funen. Illo es un del quartieros de immigrantes le plus cognoscite in Danmark. 70 pro centos del habitantes de Vollsmose es immigrantes, e como multe altere tal quartieros illo es notori pro le criminalitate e tumultos frequente, facite per bandas de juvene musulmanes.

Quando le policia face arrestationes in Vollsmose il sole resultar in grande tumultos, ma surprendentemente isto non ha essite le caso hodie.

FC Copenhagen faceva le impossibile – ora attende Man U

2006-08-25T01:22:00.001+02:00

A mercuridi vespere le campiones danese se assecurava participation in le Champions League – le torneo de football pro le campiones europee. Isto occurreva quando illes vinceva le famose equipa hollandese Ajax Amsterdam con le cifras 2-0 in Amsterdam. Le goals esseva facite per Michael Silberbauer (a dextra in le imagine) e per Vermaelen de Ajax, qui marcava contra su proprie equipa. Ajax habeva ganiate le prime partita in Copenhagen con 2-1.

Ora le equipa danese confrontara le tremende Manchester United in gruppo F, que anque contine Benfica de Portugal e Glasgow Celtic de Scotia.

Il es le prime vice desde 1998 que un equipa danese participara in le Champions League. In 1998 Brøndby IF participava in le gruppo D con Manchester United, Bayern München e FC Barcelona. Brøndby IF vinceva Bayern München in le prime partita, ma perdeva le le resto del partitas, includente un defaite humiliante contra Manchester United con 2-6 in Brøndby. Sperabilemente FC Copenhagen ha un melior chance iste anno in le relativemente facile gruppo F.

Le equipas FC Copenhagen e Brøndby IF (que es situate in le peripheria de Copenhagen) ha essite rivales zelose justo desde FC Copenhagen esseva formate in 1992. Si FC Copenhagen habera plus successo in le Champions League que Brøndby lo habeva, il certo affligera le adherentes enthusiastic de Brøndby immensemente.

Ironicamente Brøndby habeva le chance de participar in le Champions League le anno passate, ma esseva eliminate per justo Ajax Amsterdam.

Le videos se diffunde

2006-08-23T00:55:00.000+02:00

Ora il ha videos personal in tres blogs in interlingua ultra le mie. A saper in illos de Alf Karlsson, Péter Kovacs, e Erik Enfors.

Qui deveni le sequente? :)

Nove sensation zoologic

2006-08-20T01:53:00.000+02:00

Io vive in un area assatis humide, e cata vice que il ha pluvite (lo que il face frequentemente), il ha sempre un multitude de cocleas e ranas sur le vias.

Le altere die, post haber bicyclate preter plure tal animales (e infortunatemente anque super alcun cocleas), io esseva presente a un phenomeno zoologic de interesse international: ante le porta del casa ubi io vive saltava lo que certo debe esser le plus parve rana del mundo.

Hastivemente io iva pro prender le camera e prendeva iste photos de illo:

Io intendeva placiar un casetta de flammiferos al latere del rana pro monstrar su grandor relative, me illo (le rana) non voleva cooperar e saltava via. Ma io vos da mi parola de honor, que illo vermente esseva parve - e que illo esseva un rana. (O forsan un bufon ... Esque il existe rubie ranas?)

Recipe mi excusas profunde pro iste guasto total de vostre tempore. ;)

Parto sensational in le Zoo de Copenhagen

2006-08-17T01:28:00.000+02:00

Ante un septimana, un porca domestic parturiva cinque parve porcos in le Zoo de Copenhagen, reporta plure medias danese.

Lo interessante es, que le patre del porcos non esseva un porco domestic, ma un babirusa – un animal cuje DNA es bastantemente differente de illo del porco. Le babirusa esseva placiate in le porcheria, proque illo se sentiva solitari, e pois le evento romantic occurreva.

Secundo le programma de novas de TV2 Danmark, le distantia genetic del duo animales es tanto grande como illo inter un humano e un gorilla, e le director del zoo, Bengt Holst, dice mesmo, que “le duo species es como catto e can”.

Video del Incontro Nordic

2006-08-12T19:06:00.000+02:00

Io ha apprendite que plures non ha vidite, que le prime photo in le entrata "Photos de sabbato vespere" es in effecto un video. Dunque hic illo es de novo:

Pro activar le video, clicca le button in le angulo inferior sinistre del "photo". Como mentinate antea, le video monstra participantes del Incontro Nordic cantante durante le mini-festa le sabbato vespere. Al piano es Thomas Breinstrup. Le canto es "Io in le carcere", traducite in interlingua per Hans Neerbek.

Le qualitate del video ha essite bastantemente reducite. Le videos que io prendeva de altere eventos del vespere, esseva infortunatemente troppo obscur pro esser puclicate.

Viage a casa - dominica

2006-08-05T10:57:00.000+02:00

In cammino a casa, io esseva multo contente de incontrar Yoichi Yamamoto, Rosalía Crespo Jiménes e ”Pepe” Polo in le bus de Vadstena a Mjölby. Yoichi debeva restar a un hotel in Mjölby, ma Rosalía, Pepe e io debeva prender trainos respectivemente a Stockholm e Copenhagen. Quando nos attendeva le trainos, io les vexava zelosemente con le camera e prendeva i.a. iste photos:

Photos de sabbato vespere

2006-08-05T10:10:00.000+02:00

(Pro vider plus detalios, aperi le photos in fenestras separate e aggrandi los. Pro acquirer alcun del photos in lor qualitate original, scribe un commentario in infra o invia un e-mail a ”rosenmeier (coclea) post.cybercity.dk”. Commentarios in plus es anque multo benvenite!)

Como il es le habitude, al ultime vespere del incontro il habeva un minifesta con recitationes de poesia, un joco de parolas e - naturalmente – un multitude de cantos.

Hic on canta ”Io in le carcere”, un canto traducite in interlingua per Hans Neerbek, le patre de Klaus e Hasse. (Le qualitate de video ha essite bastantemente reducite.)

Barbara Rubinstein recita poemas del poeta svedese, Tomas Tranströmer. (Hasse Neerbek anque recitava un poema del poeta danese, Johannes Jørgensen, ma io non poteva photographar lo, proque io functionava como su assistente. Infortunatemente io non succedeva a prender videos de ulle del recitationes.)

Mats Fredmark contava duo historias (un ver e un legenda urban), e Ingvar Stenström sequeva con un burla. (Le videos que io prendeva de isto es infortunatemente troppo obscur pro esser puclicate.)

Ami Hedberg, Yoichi Yamamoto e Holger Andersson.

Il es tarde, e solmente le ”nucleo dur” remane: Thomas Breinstrup, Åsmund Knutson, Hasse Neerbek e Mats Fredmark.

Hasse Neerbek e io terminava le vespere con un bira a un hotel vicin.

Incontro Nordic: Photos de sabbato - le demonstration

2006-08-05T02:03:00.006+02:00

Como on pote leger hic, un del eventos le plus notabile in le incontro esseva le demonstration pro interlingua, que habeva loco al postmeridie de sabbato. Le demonstration marchava ab le ”Folkhögskola”, trans alcun idyllic stratas de pedones e finiva al castello de Vadstena, le qual le demonstratores postea visitava. Como il es le costume, le demonstratores esseva equipate con megaphono, placards (o un placard, pro esser honeste) e un multitude de pamplethos, que esseva distribuite al citatanos stupefacite.

(Pro vider plus detalios, aperi le photos in fenestras separate e aggrandi los. Pro acquirer alcun del photos in lor qualitate original, scribe un commentario in infra o invia un e-mail a ”rosenmeier (coclea) post.cybercity.dk”. Commentarios in plus es anque multo benvenite!)

Bengt Enqvist testa le megaphono ante le partita.

Le demonstration quitta le schola e serpenta trans le traffico.

Le tardives poteva facilemente traciar le demonstration, nam illo lassava in su tracias un veritabile mar de parve jalne pamphletos in le manos del citatanos. Hic un juvene copula se absorbe al lectura.

Anque le vehiculantes esseva informate re interlingua.

Karin Henja essaya persuader un copula del avantages de interlingua.

Gunaino Enqvist distribue un pampletho.

Un del belle ecclesias in Vadstena.

Le castello de Vadstena – le destination del demonstration.

Le demonstration arriva al corte del castello.

Yoichi Yamamoto habeva viagate le longe via ab Japon pro participar in le incontro.

Ingvar Stenström surride al camera.

Ma Arne Pedersen non es tanto cooperative.

Mats Fredmark al anterior.

Gunaino Engqvist e le feminas Breinstrup.

Incontro Nordic: Photos de venerdi vespere

2006-08-05T02:03:00.004+02:00

Le vespere se approcha e on se assembla in le grande sala pro le initio official del incontro. (Anteriormente se vide Christina Breinstrup.)

Mathilde e Kathrine Breinstrup arrangia le bandieras.

Anna Wigforss.

Karin Henja e Klaus Neerbek.

Hasse Neerbek.

Qual cosa interessante reguarda Gunaino Engqvist? (Al anterior, Anna Wigforss.)

Åsmund Knutson Aukland, le amabile troll ab Hedalen.

Klaus capitula sin lucta.

Barbara Rubinstein pronuncia le discurso introductori.

Sequite per Bengt Engqvist...

Le invitate de honor, Hans Aili, pronunciava un discurso in perfecte interlingua, adjutate per su cognoscentia de latino.

Thomas Breinstrup...

Allan Kiviaho...

Åsmund...

On ascolta...

Hmm... tres gambas?

Incontro Nordic: Photos de venerdi postmeridie

2006-08-05T02:03:00.000+02:00

Le delegation danese: Hasse e Klaus Neerbek, Thomas Breinstrup, Arne Pedersen, e Mathilde, Katrine e Christina Breinstrup.

Le ”Folkhögskola” es situate justo apud le belle laco Vättern. (Photographate ab le gazon del schola.)

On se assembla pro le photos de gruppo.

Como arrangiar se le melio pro le photo? Thomas dirige.

Alora tote le mundo vole photographar. Hic es le vice de Barbara Rubinstein.

Incontro Nordic 2006: Photo de gruppo

2006-08-04T21:31:00.000+02:00

In le septimana passate io attendeva le Incontro Nordic de interlingua in Vadstena, Svedia. Hic io va presentar alcun photos, que io prendeva durante le sojorno. Le qualitate del photos ha essite reducite assi que illos non plena troppo al blog. Si alicuno vole alcun del photos in lor qualitate original, simplemente scribe me al adressa: rosenmeier (coclea) post.cybercity.dk.

Que nos commencia con un photo de gruppo (pro vider plus detalios, aperi lo in un fenestra separate e aggrandi lo):

Sur le photo se vide, ab sinistre:

Fila posterior: (stante) Esko Kangas, Erik Enfors, Holger Andersson, Olavi Moilanen, Bengt Engdahl, Åsmund Knutson, Hasse Neerbek, Brita-Lisa Kiviaho, Bertil Palmquist, Maria del Rio Rioja, José ”Pepe” Rodriquez Polo, Gerd Gustafsson, Arne Pedersen, Rosalía Crespo Jiménez, Johan Wigforss, Kurt Gustafsson, Yoichi Yamamoto, Ami Hedberg e Anna Wigforss.

Fila medie (sedente sur bancos): Hans Aili, Ingvar Stenström, Bengt Engqvist, Karin Henja, Gunaino Engqvist, Barbara Rubinstein, Klavs Neerbek e (sur le terra) Mats Fredmark.

Fila anterior (sedente sur le terra): Thomas, Christina, Mathilde e Kathrine Breinstrup.

Imagines de un vespere de interlingua in Copenhagen

2006-05-31T00:47:00.010+02:00

Le ultime martedi de cata mense le Union Danese pro Interlingua tene reuniones pro le interessatos in le Schola de Nyboder in Copenhagen. Hic es alcun photos prendite durante le reunion in maio.

Iste jalne casas in fila es le quartiero Nyboder, del qual le schola deriva su nomine. Nyboder esseva construite in le 17me seculo pro allogiar marineros.

Le equipa del vespere (ab sinistre): Bjarne Hosbo Poulsen, Thomas Breinstrup, io mesme e Klavs Neerbek. Un quinte participante prefereva remaner anonyme, alora ille operava le camera.

Bjarne se sentiva si elevate per le compania, que ille quasi quitava le solo.

Thomas distribue papiros, durante que Klavs gaude de un pomo.

Thomas explica...

Io oblidava prender un photo del multe placas advertiente de pediculos in le schola. Ma si il se monstra que io ha incurrite alcunes, io va tentar de attrapar un e photografar lo. ;)

Mappa del usatores de interlingua

2006-05-26T15:08:00.000+02:00

Hic es un mappa, ubi interlinguanos pote indicar, ubi illes vive. (Initiate per Giovanni Nappi.)

Esque le Ragnarok se approcha?

2006-03-22T02:40:00.000+01:00

Secundo le mythologia nordic, le fin del mundo – Ragnarok – va esser precedite per le hiberno de Fimbul – un hiberno que dura tres annos sin pausa.

Vidente le bulletin meteorologic danese, il es tentante demandar se, si le hiberno de Fimbul ora ha venite: Le temperaturas frigide continua indefinitemente. Quando va le hiberno finir?

Blochistas sur le aqua

2006-03-21T21:39:00.000+01:00

Vidente le pictura del nave a vela 'Gothenburg' al sito de Alf Karlsson, Petro Ferrero commentava, que ille credeva haber vidite le nave al tour del canales in Gothenburg (le citate), durante le conferentia de interlingua le estate passate. Isto me faceva pensar a iste tour, in le qual io anque participava.

Ci es alcun photos, que io prendeva con mi telephono durante illo. (Io los ha placiate a mi sito personal, proque Blogger lo face impossibile postar plus que un photo in le mesme entrata con un bon lay-out.) Infortunatemente mi telephono esseva mal adjustate, alora le qualitate del imagines non es le optime.

Que es isto?

2006-03-15T22:57:00.000+01:00

Si vos non jam ha audite del nove theoria del monstro de Loch Ness, pote vos, reguardante le photo, dicer que es illo? (Vide le responsa (probabile) in le commentarios.)

"Proque io publicava ille designos"

2006-03-12T11:53:00.000+01:00

Al dece-novem de februario Flemming Rose, redactor cultural del jornal danese Jyllands-Posten, figurava in le jornal statounitese Washington Post con un articulo, ubi ille explicava su motivos pro publicar le designos famose e malfamate del phrofeta moslem Muhammad.

Rose explica que le scopo esseva reager a plure incidentes de auto-censura in Europa, causate per sensationes de intimidation crescente in questiones con un relation a Islam. Ille dice:

"In le fin de septembre un comico danese, diceva in un interview con Jyllands-Posten, que ille habeva nulle problemas con urinar al Biblia ante un camera, ma ille non osava facer le mesme con le Quran. Isto esseva le culmine de un seria de incidentias de auto-censura alarmante. Le septembre passate, un autor danese de libros pro infantes, non poteva trovar un illustrator pro un libro in re le vita de Muhammad. Tres personas refusava le labor in timor del consequentias. Le persona qui finalmente acceptava, insisteva a esser anonyme, qual, pro me, es un sorta de auto-censura. Traductores europee de un libro critical de islam, anque non voleva que lor nomines appareva al frontispicio del libro apud illo del autor, un politico nederlandese de origine somailan, qui mesme debeva celar se."

Rose lista plure altere incidentias recente ubi le libertate de expression habiva essite impedite per timor de confrontar themas concernente islam, e continua:

"Isto esseva un nova legitime, que nos debava coperir, e Jyllands-Posten decideva a facer isto per usar le principio journalistic bon cognoscite: "Non narra, monstra!" Pro isto Rose demandava membros del association de designatores danese "designar Muhammad como vos le vide".

Rose explica: "Nos ha un tradition de esser satiric in relation a personas public, e isto esseva reflectite in le designos. Le designatores tractava islam in le mesme maniera que illes tracta christianismo, buddhismo, hinduismo e altere religiones. E per tractar moslems in Danmark como euqales, illes declarava: Nos vos integra in le tradition de satira danese, proque vos es un parte de nostre societate, e non estranieros. Le designos include, non exclude, moslems."

In re le designo le plus malfamte, monstrante Muhammad con un bomba in le turban, Rose dice: "Voces irate clame que le designo dice que le propheta es un terrorista o que omne moslem es un terrorista. I lo interpreta differentemente. Qualque personas ha prendite le religion de islam hostage per commitar actos terroriste in le nomine del propheta. Illes es, qui ha date le religion un mal fama."

Rose anque dice: "Ha Jyllands-Posten insultate e mal respectate islam? Isto certo non esseva su intension. Ma que significa recpecto? Quando io visita un mosque, io monstra mi respecto per remover mi scarpas. Io seque le costumes, justo como io lo face in un ecclesia, synagugue o cata altere placia solemne. Ma si un credente exige que io, un non-credente, seque su taboos in le dominio public, ille non demanda de mi respecto, ma de mi submission. E illo es incompatibile con un democratia secular."

"Isto es exactemante proque Karl Popper, in su obra seminal "Le societate aperte e su inimicos", insistava que on non debe esser tolerante del intolerante. In nulle parte co-existe si multe religiones pacificamente como in un democratia ubi le libertate de expression es un derecto fundamental. In Saudi Arabia, on pote esser arrestite pro portar un cruce o haber un Biblia in su coffro, ma moslems in le Danmark secular pote haber su proprie mosques, cemeterios, scholas, stationes de television e radio."

Rose anque explica, que su tempore como correspondente in le Union Sovietic, le ha facite sensibile de exigentias de censura a causa de offensa. Ille vide un paralello inter le maniera que le systema sovietic denominava su criticas anti-sovietic e le assertion que le designos es anti-islamic.

"Le lection del guerra frigide es: Si on cede de exigentias totalitari un vice, nove exigentias seque. Le West vinceva in le guerra frigide, proque nos manteneva nostre valores fundamental, e non appaciava tyrannos totalitari."

Lege le articulo integre ci: http://www.washingtonpost.com/wp-dyn/content/article/2006/02/17/AR2006021702499.html

"Happy slapping" se expande a Danmark, guidate per le television

2006-03-11T02:47:00.002+01:00

Ora a qualcosa completemente differente (e plus seriose). Ab nostre reporter criminal nos ha recipite le notitia sequente:

In le annos passate un infortunate moda se ha dispersate in paises occidental, super toto Angleterra. Le phenomeno, que ha essite denominate 'happy slapping' ('colpar gaudiose'), es un special typo de criminaliate, ubi le perpetrator commite actos de violentia contra victimas aleatori, que lor co-perpetratores filma con lor telephonos de camera. Postea, illes invia le film a lor amicos, le quales es assi sollicitate a facer simile films.

Naturalmente, le perpetratores de tal crimines es quasi sempre adolescentes (inter 13 e 19 annos), e le victimas ha plus soventemente le mesme etate.

In Angleterra le incidentias de 'happy slapping' ha essite numerosissime, e in al minus un incidentia, le victima ha morite de su vulneres. Totevia, usque a iste septimana, nulle incidentias habeva occurite in Danmark. (Al minus, nulle habeva essite denunciate al policia.)

Ma isto se cambiava, post que le station televisori TV2 monstrava un longe segmento del phenomeno in lor magazin criminal "Station 2" al 27 de februario. Jam al 3 de martio occureva le prime incidentia danese, quando un puera de dece-sex anno esseva arrestate e imprisionate pro haber filmate le attaco a un puero del mesme etate con su telephono, e al lunedi le sex de martio, occureva un simile attaco al insula de Fionia. Hic le victimas esseva duo pueros de septe e dece annos, que recipeva palmates e colpos de pugno e un genu in le scroto per duo plus vetule pueros. (Vide p.ex.: http://www.berlingske.dk/indland/artikel:aid=705614/ (in danese).)

Le phenomeno habeva probabilemente trovate su via a Danmark in omne circumstancias, ma que le prime incidentias occure si rapidemente post le longe description in le television, es certo suggestive. Sperabilemente nulle interlinguanos va esser inspirate a practicar 'happy slapping' post haber legite iste notitia. ;-)

Parolas 'adulte'

2006-03-11T02:47:00.001+01:00

Que nos commencia iste blog in un maniera sobrie e informative. ;-)

In le sito de Gaymundo (que contine informationes in re homosexualitate in interlingua) io trovava iste lista del parolas 'adulte' (sexual) in interlingua: http://www.geocities.com/gaymundo/parolasadulte.txt. (Lege a proprie risco!)

Il ha alcun anglicismos al lista, que non pare esser vermente international, ma illos es assatis amusante. (In omne caso si on ha un humor si immatur como le mie.)

Benvenite a mi nove blog

2006-03-11T02:47:00.000+01:00

Benvenite a mi secunde blog in interlingua.

Mi prime blog habeva un curte vita. Io lo creava anteheri, e heri - quando io me connecteva a Blogger pro scriber in illo - illo habeva disparite de mi "dashboard". Naturalmente le 'tech support' de Blogger non pote incommodar se con procurar lo, e viste que io non pote scriber nove messages in illo, io ha debite crear iste blog in su loco.

(Io non mesmo pote cancellar le vetule blog, que indefinitemente debe flottar inanimatemente in le interrete. Vos pote vider le 'cadavere' hic: http://falcatorrosa.blogspot.com.)

Sperabilemente iste blog va haber un vita plus longe. : )